vk.com/chtuz сӑнӳкерчӗкӗ

Чӑваш патшалӑх ҫамрӑксен театрӗн артистне Василий Павлова уйӑхсерен патшалӑх пособине мӗн ӗмӗр тӑршшӗпе парса тӑма йышӑннӑ. Ҫак укҫана Раҫҫей тата чӑваш халӑх артисчӗ «культурӑри тава тивӗҫлӗ ӗҫсемшӗн» тивӗҫнӗ.

Василий Павлов театр ӳнерӗнче 1967 ҫултанпа тӑрӑшать тесе пӗлтернӗ театрта. Малтан Чӑваш пукане театрӗнче ӗҫленӗ, 1971-2023 ҫулсенче Чӑваш патшалӑх ҫамрӑксен театрӗнче ӗҫленӗ. Чылай ҫул вӑл театр труппине ертсе пынӑ. Халӗ вӑл тава тивӗҫлӗ канура.

www.музуч.рф сӑнӳкерчӗкӗ

Пуш уйӑхӗн 27-мӗшӗнче Шупашкарти Ф.П. Павлов ячӗллӗ музыка училищинче «Тӑмра кӗввинче – ӗмӗрсен сасси» ӑсталӑх лаҫҫи ӗҫлессине эпир унччен пӗлтернӗччӗ.

Аса илтерер: ӑна Хусанти Н.Г. Жиганов ячӗллӗ патшалӑх консеваторийӗн доценчӗ, РФ Композиторсен союзӗн членӗ, этномузыковед, искусствоведени кандидачӗ Геннадий Макаров ирттернӗ.

Доцент авалхи музыка инструменчӗсемпе: тӑмрапа тата тункӑрпа — калассин вӑрттӑнлӑхӗсене уҫса панӑ. Ӑсталӑх лаҫҫине музыка училищин «Пӗччен тата ушкӑнпа халӑх юррисене юрласси» уйрӑм преподавателӗсемпе унта вӗренекенсем хутшӑннӑ. Унсӑр пуҫне районсенчи фольклр коллективӗсен ертӳҫисем те пырса ҫитнӗ.

Никита Арсентьев, Иван Иванов, Никита Ильин, Даниил Данилов, Надежда Еремеева, Павел Биктимиров студентсем тӑма тата тункӑр ӑсталӑхне аван пӗлнине кӑтартса панӑ.

Павел Данилов страницинчен илнӗ сӑнӳкерчӗк

Чӑваш Енӗн вице-премьерӗ Павел Данилов республикӑпа сывпуллашнӑ. Регион правительствинче виҫӗ ҫул ытларах ӗҫленӗ ҫав ҫын ӗҫрен каяссине халӑх тетелӗнчи хӑйӗн страницинче шӑматкун пӗлтернӗ.

Хальлӗхе республика Элтеперӗ ун пек хушӑва алӑ пусман. Данилов ҫак кунсенче отпускра пулнӑ-мӗн. Кун пирки forum.na-svyazi.ru портал хыпарланӑ.

Павел Данилов Шупашкарта 1974 ҫулта ҫуралнӑ. 1995 ҫулта Плеханов ячӗллӗ Раҫҫейри экономика университетӗнчен вӗренсе тухнӑ. 2000 ҫулта ӑна Шупашкар хула мэрӗн ҫумӗ пулма шаннӑ. Каярах вӑл Ял хуҫалӑх министерствипе РФ Стройминне пӑхӑнакан учрежденисене ертсе пынӑ.

2021 ҫулхи кӑрлач уйӑхӗнче Павел Данилова Чӑваш Енӗн вице-премьерӗ пулма шаннӑ, тепӗр икӗ уйӑхран строительство тата транспорт министрӗн тилхепине тыттарнӑ.

Николай Кондрашкин. Елизавета Долгова страницинчен илнӗ сӑнӳкерчӗк

Паян, пуш уйӑхӗн 30-мӗшӗнче, Чӗмпӗрти Николай Кондрашкин скульптора 75 ҫул тултарнӑ.

Николай Григорьевича Чӑваш наци ӑслӑлӑхпа ӳнер академийӗн президиумӗпе президенчӗ Евгений Ерагин тӗнче тетелӗнчи ушкӑнсенчен пӗринче саламланӑ.

«Тӑван халӑхӑн мухтава тивӗҫ ывӑлне, ҫуралнӑ кунпа чун-чӗререн саламлатпӑр!

Иксӗлми вӑй-хӑват, ҫирӗп сывлӑх, тӑнӑҫлӑхпа ырлӑх, телей сунатпӑр.

Сирӗн хастарлӑх, чунри пуянлӑх тӗлӗнтерет, савӑнтарать. Малалла та тӑван халӑхшӑн нумай ырӑ ӗҫ тума пултарулӑх ҫӑлкуҫӗ тапсах тӑтӑр», — тесе ҫырнӑ саламра.

Ефросиния Александрова. cheb-centr.soc.cap.ru сӑнӳкерчӗкӗ

Шупашкарта пурӑнакан Ефросиния Александрова паян 100 ҫул тултарнӑ.

Ефросиния Александровна Ҫӗрпӳ районӗнчи Вӑрманкас Пайкилт ялӗнче ҫуралнӑ. Тӑван ҫӗршывӑн аслӑ вӑрҫин ҫулӗсенче ҫурлапа ыраш вырнӑ, ҫӑматӑ йӑваланӑ. Вӑрҫӑ хыҫҫӑн вӑл Шупашкара килсе ӗҫе вырнаҫнӑ.

Шупашкарти пир-авӑр комбинатӗнче пир тӗртекенте вӑл нумай ҫул ӗҫленӗ. «Ҫавӑнтах куҫ вӑйӗ чакрӗ, унтан ӗҫлеме пӑрахрӑм», — каласа кӑтартнӑ кинемей.

Ефросиния Александровнӑн ачи-пӑчи ҫук. Ӑна паян ҫывӑх тӑванӗсенчен пӗрин хӗрӗ пӑхать.

"Википедиа" сайтри сӑн

«Тӑван ҫӗршыв ывӑлӗсем» офицерсен юлташлӑхӗ Шупашкарти ҫӗнӗ урама Ҫӗрпӳ районӗнчен тухнӑ Александр Викторов генерал-полковник ятне пама сӗннӗ. Вӗсем ЧР Элтеперӗпе Олег Николаевпа Мускавра тӗл пулнӑ чухне ку ыйтӑва ҫӗкленӗ.

Ҫитес ҫул Александр Викторов ҫуралнӑранпа 100 ҫул ҫитет. Вӑл Тӑван ҫӗршывӑн Аслӑ вӑрҫи вӑхӑтӗнче Курск ҫапӑҫӑвне те хутшӑннӑ. 1944 ҫулта ӑна Ӗпхӳри ҫар училищине янӑ, кун хыҫҫӑн вӑл ҫӗршыв чиккине хураллакансен ҫарӗнче службӑра пулнӑ. Александр Григорьевич 2003 ҫулта Питӗрте вилнӗ. Юлашки ҫулсенче вӑл унта пурӑннӑ.

chnmuseum.ru сӑнӳкерчӗкӗ

Пуш уйӑхӗн 28-мӗшӗнче Чӑваш тӗррин музейӗнче Василий Димитриев историк ҫуралнӑранпа 100 ҫул ҫитнине халалласа «В поисках кладов истории» (чӑв. Истори пуянлӑхне шыраса) курав уҫӑлӗ. Вӑл Василий Димитриевич ӗҫӗсемпе тата унӑн япалисемпе паллаштарӗ, чӑваш халӑх истоорине учёнӑй епле курнине уҫӑмлатса парӗ.

Василий Димитриев пирки ӗҫтешӗсем чӑваш медиевистикин патриархӗ тенӗ, мӗншӗн тесен вӑл чӑваш тӗнчин вӑтам ӗмӗрне тӗпченӗ. Архивсемпе вулавӑшсенче нумай ларса вӑл ҫӗнӗ фактсене, документсене асӑрханӑ. Сӑмахран, феодализм тапхӑрӗнчи чӑвашсен историйӗпе паллаштаракан документсене Мускаври, Питӗрти архивсенче тупнӑ. Ҫавсене тӗпе хурса Шупашкар пирки пуҫласа хӑҫан асӑннине пӗлме пултарнӑ.

www.nbchr.ru сӑнӳкерчӗкӗ

Ӗнер, Пӗтӗм тӗнчери поэзи кунӗнче, чӑваш халӑх поэчӗ Валери Туркай Чӑваш Енӗн наци вулавӑшне хӑйӗн библиотекинчи кӗнекесене парнеленӗ.

Вӗсенчен пӗри — тутар чӗлхипе пичетленӗ «Габдулла Тукай» энциклопеди. Унта Валери Туркай ҫинчен ҫырнӑ статья та пур иккен. Кӗнекере чӑваш поэчӗ тутар поэчӗн эткерлӗхне чӑвашла куҫарма хастар хутшӑннине палӑртса хӑварнӑ.

Библиотекӑна ҫавӑн пекех пушкӑрт поэчӗн Мустай Каримӑн вырӑсла пичетленнӗ «100 стихотворений» тата балкар поэчӗн Кайсын Кулиев ҫуанӑранпа 100 ҫул ҫитнине халалласа пичетленӗ кӑларӑм, «Моя бунтарская карма» статйисемпе интервьювӗсен сборникӗ.

Наци вулавӑшӗн директорӗ Роза Лизакова поэта парнешӗн тав тунӑ.

Вячеслав Александров. culture.cap.ru сӑнӳкерчӗкӗ

Чӑваш халӑх артисчӗ Вячеслав Александров хӑй вӑхӑтӗнче СССР халӑх артисткипе Вера Кузьминапа ҫыру ҫӳретнӗ. Кун пирки вӑл Чӑваш патшалӑх акадми драма театрӗнче иртнӗ моноспектакль вӑхӑтӗнче каласа кӑтартнӑ.

«Шкулта вӗреннӗ чухне эпӗ пукане театрӗн кружокне ҫӳренӗ. Унта эпир сценкӑсем те, спектакльсем те лартма хӑтланаттӑмӑр. Ҫав ӗҫсемпе ялти клубсем тӑрӑх ҫӳреттӗмӗр. Канаш районне чӑваш театрӗ килсен кайса курманни ман нихҫан та пулман. Пӗринче мана Вера Кузьминапа тата Валерий Яковлевпа паллаштарчӗҫ. Вера Кузьминична ун чухне Чӑваш театр студине пырса пӑхма сӗнчӗ. Пултарулӑха тӗрӗслеме. Эпӗ шкул пӗтернӗ вӑхӑта унти студие илсе пӗтернӗччӗ. Ҫапла эпӗ Пукане театрне лекрӗм. Анчах чӑваш драмин сцени ҫинче выляс ӗмӗт мана кунта илсе ҫитерчӗ-ҫитерчех», – каласа кӑтартнӑ Вячеслав Александров.

Вячеслав Александров Вера Кузьминапа ҫыру ҫӳретнине аса илнӗ. Чӑваш патшалӑх академи драма театрӗнчи унӑн пӗрремӗш ролӗ Валерий Яковлев Николай Терентьев Вера Кузьмина валли ятарласа ҫырнӑ ӗҫ тӑрӑх лартнӑ «Ҫылӑх» спектакльте пулнӑ.

cap.ru сӑнӳкерчӗкӗ

Канаш округӗнчи Юмансар ялӗнче пурӑнакан Анна Никитина паян 100 ҫулхи юбилейне паллӑ тунӑ. Ӑна сумлӑ уявпа саламлама вырӑнти артистсем те килнӗ.

Анна Никитична нумай ачаллӑ ҫемьере ҫуралнӑ. Шкул пӗтерсен колхозра ӗҫлеме тытӑннӑ, шкулта техслужащире чылай вӑхӑт тӑрӑшнӑ.

Христофор Максимовичпа ҫемье ҫавӑрсан вӗсем 8 ача ҫуратса ӳстернӗ. Хальхи вӑхӑтра Анна Никитична ывӑлӗн ҫемйипе пурӑнать. Унӑх халӗ 17 мӑнук, 12 кӗҫӗн мӑнук пур.