Туслăхпа тăванлăх

Аркадий Ĕçхĕл | Сăвă | 1972 | 1 445


Ир-ир ытарайми тавралăх

Сенкер тĕтре ăшне путать.

Хĕвел куллен шăпах çур талăк

Совет çĕршывĕпе утать.

 

Килтен урамалла тухатăп,

Яланхи май ĕçе кайма.

Урамăн ик енне пăхатăп —

Ĕлкĕрейместĕп пуç тайма.

 

Пĕрне-пĕри телей сунатпăр —

Юлташ та пĕлĕш, тантăш, тус.

Тен, çакăнтан вăл пуçланать-тăр

Пур халăх пĕрлĕхĕ — Союз?!

 

Çĕршывăм тăрăх эп каям-и,

Утам-и ĕмĕр тăршшĕпе, —

Таçта çитсен те тус-тăванăм

Кĕтсе илет чун ăшшипе.

 

Атте мана тахçан калатчĕ: —

Пин ылтăн мар, пин тус туян,

Вара эс çийĕн шур калачă,

Вара эс пулăн чи пуян. —

 

Туспа çула тухма хаваслă,

Туспа инçе çул кĕскелет.

Умна инкек килсе тухсассăн,

Тусу хăюллăн хӳтĕлет.

 

Тусна эс те чун пек упратăн, —

Хуйхи-суйхи йăлт çурмалла.

Туспа пĕрле сан, тем пулсан та,

Курассине йăлт курмалла.

 

Çапла утатпăр алла-аллăн —

Юлташ та пĕлĕш, тантăш, тус,

Çапла пуçланнă вăл тăванлăх,

Хăватлă пĕрлĕх — пĕр Союз.

 

Ал панă чух аван туятăн

Чăн тусăн алă ăшшине.

Ютти кĕреймĕ пĕр никам та

Таса тăванлăх хушшине.

 

Тăван çĕршыв!

Çĕр теслĕ халăх

Пĕр аслă йыш пек пурăнать.

Пире малтан мала утмалăх

Мал ĕмĕт уççăн курăнать.

 

Октябрьпе пĕрле çĕкленнĕ

Çак аслă çар, çак аслă йыш.

Пире валли çул уçнă Ленин,

Пилленĕ ырă кун Ильич.

 

Тăван çĕршыв, Совет Союзĕ,

Сана чыслать паян тĕнче!

Пур халăхсен чи çывăх тусĕ,

Этемлĕх куçĕ сан çинче.

 

Тăван çĕршыв!

Мĕнех эп калăп

Кунтан та ытларах тата?

...Хĕвел куллен шăпах çур талăк

Совет çĕршывĕпе утать.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: