Сан илем сăн-питре анчах мар.
Таврăнатпăр хиртен юнашар.
Шупкаланнă сенкер тутăру,
Тусанланнă сап-сарă кăтру.
Автолпа вараланнă аллу,
Хĕвелпе пăхăрланнă хулу.
Арçынла тайлăкрах кăшт утту.
Йăл кулать куштăрканă туту.
Çăл шывпе питне çурăн вăр-вар,
Асăнта: «Пит каçа ан хăвар,
Ыран ир хĕвелпе тăмалла,
Ĕç çинче васкавар пулмалла...»
Эп кĕтетĕп... Хура хурама
Хуплаймасть-çке — инкек! — урама.
Çĕмĕрессĕм килет хунара,
Кам именмĕ кун пек çутăра?
Ак сас пачĕ хуллен калитке,
Акăш пек утать шур кĕлетке...
Кил, савниçĕм, часрах, ыталам!..
Ан ятла, чакăр куçлă урам.