Каска çинче лараççĕ ватăсем.
Хăлаç çитми кĕреш-юман каска.
Куç умĕнче шăваççĕ ĕмĕрсем —
Мăнукăм, эс ан ватăл, ан васка!
Пуплеççĕ ватăсем: «Çаплаччĕ ĕлĕк...
Вăрман анатчĕ хамăр ту çинех.
Ту айĕнче шăнкăртататчĕ çăлĕ,
Курасчĕ айлăмри улăхсене!
Такам касса пĕтерчĕ çирĕке,
Типсе çухалчĕ шăнкăрти çырма.
«Пусса ан сур, — каланă ĕлĕкех, —
Хăвах унта килетĕн шыв ăсма!»
Этемлĕх килĕ-çурчĕ — çутçанталăк.
Йĕрки-саккунĕсем ун пит кăра.
Ăçта шыв пур, унта кирлех хăвалăх.
Ăçта пуш хир, унта çăл ан шыра...
Хуçасăр кил тухать час йĕркерен.
Юпи çĕрсен тӳнет карти-хури...
Хуçалăхра хуçа кирлех иккен,
Çанталăкăн хуçи те пултăр-и!
Ăçта çӳретĕп — çавăнта хуçа эп,
Ăçта кайсан та, эсĕ те хуçа.
Эп çĕмĕрт çеçкине хăйса хуçаймăп,
Таптаймăн эс çын лартнă йывăçа...
Ав, кăткă сĕтĕрет килне тупра,
Пыл хурчĕсем сĕрлеççĕ таврара,
Ырми-канми чавать çĕр каюра —
Эс вĕсене ан тив, хуçа, — упра!
Эс пул хуçа кашни чĕкеç чĕппишĕн,
Тăри юрришĕн те эсех хуçа!
Мулкач çури санран тутантăр кишĕр,
Ялан çул уçă пултăр çăлкуçа.
Çанталăкăн тăшманĕсем сахал,
Чи хăрушши, тăшманĕ, — пĕл, — этем.
Вăл упрама пĕлсен кăна кал-кал,
Çунса çаралмĕç çĕрĕ-шывĕсем!
Этемлĕх килĕ-çурчĕ — çут çанталăк,
Этем пулма ӳстерчĕ вăл пире.
Пиртен вăл юлтăр ыррăн пурăнмалăх,
Илемлĕ пултăр ĕмĕр-ĕмĕрех!