Çилпе çӳрет ялта сăмах,
Кусса çӳрет сăмах çăмхи:
Пĕри пĕçернĕ тет çăмах,
Теприн çухалнă тет чăххи...
Сăмах çумне сăмах хушсан,
Хайхи сăмах пулать така.
Яла пĕр-иккĕ çаврăнсан,
Кăркка тăваççĕ леш чăхха...
Ялта суеçĕсĕр кичем!
Кирлех-çке кулăш кустăрми.
Кулма мансан ял çыннисем,
Тек шăнкăртатмĕ ял çырми.
Шыв сыпнă пек çӳре-çӳре
Ан кӳрентерĕр урама.
Сăмах-юмах кирлех пире
Чиперрĕн калаçса кулма!