Çĕлен тесе вăрçаç Эптĕлмене,
Сĕм вăрманта куртăм çĕлене.
— Эптĕлмен пек усал эп пулман, — тет, —
Эптĕлмен чул çынна йĕртмен, — тет.
Кашкăр тесе вăрçаç Эптĕлмене,
Сĕм вăрманта куртăм кашкăра.
— Эптĕлмен пек тискер эп пулман, — тет, —
Тăр кăнтăрлах пĕртте çаратман. — тет.
Явăл тесе вăрçаç Эптĕлмене,
Тĕттĕм каçра куртăм явăла.
— Эптĕлмен пек путсĕр эп пулман, — тет, —
Эптĕлмен чул ылхан эп туман, — тет.
Халăх мурĕ тесе вăрçаç Эптĕлмене,
Çеçенхирте куртăм мур чирне.
— Эптĕлмен пек шелсĕр эп пулман, — тет, —
Чĕрĕллех çынсене чикмен, — тет.
Эптĕлмен çĕлен мар, кашкăр мар,
Эптĕлмен явăл мар, мур чир мар,
Вĕсенчен те ирсĕр усал вăл,
Вĕсенчен те тискер йĕксĕк вăл.