Çулсен шăв-шавлă сĕм вăрманĕнчен
утса эп тухрăм шухăш вĕçнĕ çĕр.
Калла эп пăхрăм çаврăнса темччен:
кĕрлерĕ çĕрлехи хула кĕр-кĕр!
Мана кĕрхи хĕп-хĕрлĕ чечексен
пахчи пек йăлкăшан хулам кирлех:
куçра чĕтрерĕç унăн çутисем
кăвар çунатлă лĕпĕшсем пекех.
Сисмерĕм: вĕсене сăнанăçем,
Çывхарчĕç шавласа ман паталла
кунсем, çулсем, туссем, паллакансем —
хавхалану çĕклерĕ кăмăла.
Пĕлетĕп: пурте ман ăша кĕмен.
Тен, хытнă пулĕ манăç маскипе
хăшпĕр кунсен, туссен, паллакансен
сăн-пичĕ маншăн, вырăн çуккипе?
Ку ним те мар.
Элчелĕм, сан аллу
Юратнă çыннăн сăнарне анчах
хуплассинчен шик пур: сивлек куллу —
сисетĕп — ыррине сĕнмест час-час.
Тен, çавăнпа та тепĕр чух, сана,
суккăрскере, чунтан вăрçа-вăрçа,
вилес пек кураймастпăр — пĕл çакна:
ларатпăр шăппăн чĕлĕм сăвăрса.
Телей çуначĕ сĕртĕнсен вара,
эпир сана, ача пек çĕкленсе,
мухта-мухта каратпăр çăвара,
кĕтмен хаваслăхпа чечекленсе.
Пит асăнмастпăр чăркăш кăмăлна,
манатпăр эс ик питлĕ пулнине.
Усалланса, хаяр çыртса шăлна,
куçран ĕнер çеç хăррăн пăхнине.