Шанчăк ункă майлах туйăнать хăш чухне,
ун тавра çулсерен çаврăнатпăр ырса.
Тен, эпир те çаплах, йыхăрса пĕр-пĕрне
шанчăксен ункине юлнă мар-ши тăрса?
Каласам: тен, санла йăпанни ытлашши?
Кăлăхах пуль мĕнпур хумхану, тертленӳ?
Сивĕнмест-çке пĕрех ырă ĕмĕт ăшши,
ман чунра вăл каллех çуратать ĕненӳ.
Сулçăсем тӳпере кайăксем пек сатур
çаврăнаççĕ кĕрхи çилпеле темĕнччен.
Манăн шухăшсенче яланах эсĕ пур,
калаçатăп санпа çăлтăрсем сӳниччен.
Кăмăл кăкшăмĕ пурпĕр тулмасть, ăш канмасть —
сан киммӳ каçсерен кӳлĕ урлă каçмасть.