М.Р. Федотов профессора, 70 çул тултарнă ятпа чĕререн сума суса
Пин çăл пек — пин сăмах!
Чĕлхемĕр — Атăл евĕр.
Пиртех — хальччен — пурах
Ун ĕмĕрхи кĕрлевĕ.
Поэт, епле ӳсен
Çав кĕрлеве лексессĕн,
Хăш чух туятăн, тен,
Турра та çĕнтерессĕн!
Çаплах — кашни çынрах
Эп чĕр Сăмах кураттăм,
Иоанла Сăмах
Тесе сума сăваттăм.
Анчах ав самани
Çынпа та — çынсăрланчĕ,
Тен, Пăсăклăх тени
Чун вырăнне пуçланчĕ.
Чирленĕ Улăп пек
Халь Атăл та, туссемĕр!
Сăмах, чун пек, типет...
Ай, вил сăмахлă Ĕмĕр!
Çук, калам мар çаплах, —
Пурнатпăр-ха, пурнатпăр.
Çаплах, тăванлăхрах
Сăмах халне упратпăр.
Ăна ав Çеçпĕлле
Шăллăмăрсем чĕртеççĕ.
Поэзипе пĕрле
Ăна упрать — Чĕлхеçĕ;
Таçтан çитсе çумрах
Карлать пек Тинĕс шавĕ:
Вăл — Çак килти Сăмах,
Чĕлхеçĕмĕр Уявĕ;
Вучахĕнчи кăвар
Ан сӳнтĕр ĕçлĕ килĕн!
Пиччемĕре калар
Сума суса ăш пиллĕн:
Чăвашăн Сăмахне
Мĕн чул суйларăн, чĕртрĕн,
Этемлĕх Тинĕсне
Тирпейлĕн, ăслăн кĕртрĕн, —
Илтетпĕр — халăха,
Унра — сана тăнлатпăр,
Тавсси те Сывлăха! —
Чӳк тунă пек калатпăр:
Халь — йыш кĕрекинче
Аттелĕх — пил пек пултăр!
Чĕлхе кĕрлевĕнче
Çак тавăм — хум пек юлтăр, —
Карлать вăл — вĕçсĕр хум!
Ялтрать чун-чĕм ахахĕ.
Пиччемĕр, эсĕ ху —
Çĕршывăн чĕр Сăмахĕ.