Парне

Аттеçĕм Турă, йăлăнап:

Каçар Эс Хăвăн ывăлна,

Хăйне чармасăр кăлăхах

Вăл тунă пин-пин çылăха.

 

Парне пама ун çуккă сурăх,

Пусаймĕ вăл çук вăкăрне,

Куççуль тăкать, курсам Эс, Турă, —

Юхать куççуль, вĕри парне.

 

Эй, Турă, Эсĕ ан хăвар

Ăна пит йывăр самантра.

Чунне хур юрату-кăвар:

Вăл Саншăн ялкăшĕ — Санрах!

 

Парне пама ун çуккă сурăх,

Пусаймĕ вăл çук вăкăрне.

Куççуль тăкать,

курсам Эс, Турă, —

Юхать куççуль, чунтан парне.

 

Ан пар ултавлă явăла¹

Ачаш путек пек ывăлна, —

Мухтатăр Санăн çут ятна,

Виçесĕр аслă хăватна.

 

Парне пама ун çуккă сурăх,

Пусаймĕ вăл çук вăкăрне.

Куççуль тăкать, курсам Эс, Турă, —

Юхать куççуль, таса парне.