Тăван кил еннелле эп васкатăп,
Йыхăрать вăл мана иртенпе.
Чунăмпа ун патне туртăнатăп,
Пурăнсамччĕ, тăван, ерипе.
Эп туяп, эс кĕтен савнă енĕм:
Тĕлĕкре те чĕнен виç хĕрне.
Ывăнан пуль пĕччен, тăван килĕм,
Ир те каç шав пăхса çул хĕрне.
Çуллахи сар хĕвел эсĕ маншăн,
Юрататăп сана эп чунтан.
Тунсăхлатăп куллен хам та саншăн,
Пурнăç çулĕ пуçланнă кунтан.
Асăмра-çке ялан манăн килĕм,
Яланах вăл чĕре варринче.
Эс хушатăн вăй–хал, хаклă килĕм,
Çывăххи çук санран çĕр çинче.
Ан кулян ачусемшĕн хĕвелĕм,
Пурнăç ырă та лайăх вĕсен.
Пул тĕреклĕ, юлсам эс ăшпиллĕн,
Яланах кăмăлтан эс кĕтсем.