Аннене, Вера Афанасьевна Порфирьевăна халаллатăп
Куртăм эпĕ паян тĕлĕкре
Хамăр кил умĕнче аннене.
Куç илми тинкерет çул çине,
Чунтанах вăл кĕтет-çке пире.
Чӳрече умĕнче — йывăçсем,
Чăштăртатрĕç çилпе çулçисем.
Ман аннемĕн йăваш куçĕсем
Куççульленчĕç. Вĕсем — кӳлĕсем...
Пĕчченех кив çуртра пурăнать,
Тĕп киле миçе çул вăл тытать.
Мĕншĕн-ши ман анне ватăлать,
Мĕншĕн çӳçĕ шап-шур шуралать?..
Вĕçсе тухнă кунтан ачисем,
Халь кашнин хăйне евĕр шăпа.
Анне панă ваш-ваш çунатпа
Пит çӳле хăпараймĕç вĕсем.
Манаймастăп тăван аннене,
Вăл куллен кулянса кĕтнине.
Пуçăма çĕре çити тайсах
Эп калатăп: «Аннеçĕм, тавах...»