Туту сивĕ, вĕри мар
Эп чуп тунă чух сана.
Чунунта çук шĕл-кăвар,
Унта, ахăр, пăр кăна.
Пит-куçу та хĕлхемне
Ман çине сапмасть хуть кăшт.
Темшĕн эс улшăннине
Сиснипе вăркать ман ăш.
Ыталатăп, ак, сана —
Ĕлĕкхи мар пек чĕрӳ.
Çитмен евĕр тем ăна
Вăл тапмасть хĕрӳ-хĕрӳ.
Аллу та, чăмăртасан,
Савăнса хĕсмест алла.
Эп сана куçран пăхсан
Туртăнатăн каялла.
Ăнланатăп: ырра мар
Чĕрӳнти çак улшăну.
Алхасать чунра пушар:
Чĕптĕм çук унта шану.