Эпĕ килтĕм — эсĕ çук.
Ăçта-ши çӳретĕн?
Чунăм саншăн çуннă чух
Мĕншĕн кĕттеретĕн?
Сăмах патăн-çке ĕнер
Кĕçĕр тĕл пулмашкăн.
Килччĕ, тусăм, ан кĕттер,
Эс манпа ан ашкăн.
Эп сана килсессĕнех
Пилĕкрен ыталăп.
Чĕрери сăмахсене
Ăшшăн-ăшшăн калăп.
Саншăн çӳлĕ тӳпене
Ăнтăлăп, хăпарăп,
Йăлтăр çутă çăлтăрне
Аллунтан тыттарăп.
Санпа хĕмлĕ туйăмпа
Эпĕ ăшăнасшăн.
Анчах çук эс. Çавăнпа
Хаш! сывлатăп ассăн.