«Эх, анне чĕри. Ылтăнран е хурçă тимĕртен тунă-ши сана?»
Улькка Эльмен
«Çынна ăна пурăннă чух хĕрхенмелле,пурăннă чух...»
Илпек Микулайĕ
Анне чĕри чăтать теççĕ те,
Чăнах та, вăл чăтать.
Чул вырăнне хурса ватсан та,
Анне чĕри шаккать.
Анне чĕри çурăлать теççĕ те,
Чăнах, вăл çурăлать.
Куççуль-юнпа юхса ларсан та,
Вăл малаллах тапать.
Анне чĕри çунать теççĕ те,
Чăнах та, вăл — çунать.
Ачах та çулăмĕ тухмасть те,
Ачи ăна курмасть.
Ача çакна хăй туйиччен
Шыв-шур нумай юхать.
Анчах ун чух анне чĕри
Тек йăшăлт та тумасть.
Анне чĕри чăтать теççĕ те,
Анне чĕри çунать теççĕ те,
Анне тесе чĕнес килсен
Асра тытăр эсир те...