Чĕмпĕрти çăкасен
Чĕлтĕрти çулçисем
Тем каласшăн пекех чăвашла,
Ĕмĕр-ĕмĕр çапла
Кĕтсе ил эс тусла,
Чăвашсемшĕн чи хаклă хула.
Чĕмпĕрти чăвашсем,
Тутарсем, вырăссем,
Пурăнар-и пĕрле, тăванла.
Туслăх — пысăк тупра,
Чыслăха эс упра,
Тĕрлĕ халăхшăн хаклă хула.
Чĕмпĕрти уява,
Аслă Яковлева
Чыслама пухăнсассăн çулла,
Чăвашла тумланать,
Чăвашла савăнать
Хамăр халăхшăн хаклă хула.
Чĕмпĕрти чăнлăха
Ан кăлар манăçа,
Малашне те çĕкле кăмăла,
Аякри, çывăхри,
Анатри е тури
Чăвашсемшĕн асамлă хула.
Инçетре, çывăх мар
Авалхи Шупашкар,
Пăрахут ăнтăлать малалла.
Çĕнĕ юрă пиртен
Йышăнсам Чĕмпĕртен,
Кĕтсе ил, Чăваш ен, тăванла.