Виçĕ йăмăкăм ялта.
Кашниннех кил-çурт, пахча.
Карта выльăхĕ... «тата
Пĕр кĕтӳ ача-пăча».
Çапларах хăйсем шӳтлеççĕ,
Пухăнсан хăна-вĕрле.
Хуть хăçан —
Ирпе, çĕрле —
Пепкисем йĕрме-йĕреççĕ,
Çаруран чупса çӳреççĕ.
Кăвапа таран кĕпе.
Кăкăр умĕ йĕп-йĕпе...
Ним те мар-çке.
Астусамăр,
Еплерех ӳсмен-ши хамăр?
Хырăм пулнă параппан —
Ирĕн-каçăн çĕрулми.
Вăл пулсассăн пурăнан,
Сăн-пит çеç пулать кулми.
Пурпĕрех, хурах эшкерĕ
Вăрçăпа килсен,
Кĕреш пек туссем ĕшкерĕç
Фашиста тĕпрен.
Урăхла лару-тăру
Çĕнĕ вăхăт,
Çĕн ăру.
Сăмахлать ача, итленĕ,
Кăшт чĕлхи уçăлсанах,
Малтан —
Амăш. Ашшĕ. Ленин.
Унтан —
Спутник. Космонавт.
Сирĕншĕн малашлăх кунĕн
Хатĕрех çул парнисем.
Çилпеле хĕвел чуптунă
Хăмăр ӳтлĕ ачасем.
Çавăнпа кунта эс ĕлкĕр,
Шухăшăм, калас пурри:
Вăрçă асапне ан пĕлтĕр,
Тек ан пултăр ун хурри
Виçĕ йăмăкăн кил-çурчĕ
Пĕтĕм халăхăн кил-çурчĕ!