Инçе выртсан çулăмăрсем,
Йывăр килсен кунăмăрсем,
Аннемĕрсем кайман асран.
Аннемĕрсем-чĕремĕрсем,
Сире савса, вутра çунса,
Вутран тухса, вăхăт тупса,
Салам яраттăмăр ютран.
Курман чухне куçăмăрсем,
Утман чухне урамăрсем,
Аппамăрсем кайман асран,
Аппамăрсем-чунăмăрсем.
Сире савса, вутра çунса,
Вилес çĕртен сăмах тупса,
Салам яраттăмăр ютран.
Пĕрле чухне пиччемĕрсем,
Алра чухне черккемĕрсем,
Инкемĕрсем кайман умран.
Инкемĕрсем-сеçкемĕрсем,
Сире савса, вутран тухса,
Мире савса, черкке тытса,
Салам калаттăмăр туйра.
Кулса килсен кунăмăрсем,
Вутран тухсан туппăмăрсем,
Саван хĕрсем тухман асран.
Йăмăкăмсем-ĕмĕтĕмсем,
Сире савса, салтак пулса,
Савни пулса, çеçке тытса,
Эп килтĕм вутлă вăрçăран.