10 ҫул каялла Чӑваш халӑх сайчӗ йӗркеленнӗ. Вӑл кун Чӑваш халӑх канашлӑвӗнче пӗрремӗш тема уҫӑлнӑ. Унтанпа хӑйӗн Чӑваш халӑх сайчӗ кун-ҫулне пуҫланӑ тесе шутланать те.

10 ҫул хушшинче эпир сахал мар ӗҫ турӑмӑр теме пулать. Чӑваш халӑх сайчӗн уҫлӑхӗнче вуншар сайт йӗркеленнӗ — Чӑваш халӑх канашлӑвӗ, Электронлӑ вулавӑш, Электронлӑ сӑмахсарсен пуххи, Орфографи тӗрӗслемелли хатӗрӗн сайчӗ, Чӑвашла терминсем ӑсталамалли сайт, «Чӑваш тӗнчи» сӑнсен галереи, чӑвашла сайтсем каталогӗ (хальлӗхе вырӑсла кӑна-ха), «СУМ» электронлӑ лавкка, Халӑх пултарулӑхӗн сайчӗ (yumah.ru), «Тупмалли юмахсем» вӑйӑ-сайт, чӑвашсен кун-ҫулне уҫса паракан «Повествование о чувашах» сайт тата ыттисем. Хӑшӗ-пӗри (сӑмахран, чӑвашла юрӑ-кӗвӗ пуххи) паянхи кунччен пурӑнса ҫитереймерӗ пулин те хӑй вӑхӑтӗнче йӗр хӑварчех.

Паян вара, Чӑваш халӑх сайчӗ 10 ҫул тултарнӑ тӗле эпир сире валли ҫӗнӗ сайт йӗркелесе патӑмӑр — Ваттисен сӑмахӗсем ятлине. Вӑл as.chv.su адреспа вырнаҫнӑ. Унта эсир чӑваш халӑхӑн ӗмӗр-ӗмӗр тӑршшӗпе пухӑннӑ ӑс-хакӑлӗпе паллашма пултаратӑр. Сайта эпир Чӑваш патшалӑх гуманитари ӑслӑлӑхӗсен институчӗ хатӗрлесе кӑларнӑ «Ваттисен сӑмахӗсем» кӗнекене тӗпе хурса йӗркелерӗмӗр. Пурӗ 14021 ваттисен сӑмахӗ унта вырнаҫрӗ. Ҫак пухха малашне те анлӑлатма шутлатпӑр — вӑл кӗнекене кӗменнисем те ҫук мар пуль тетпӗр. Сӑмах май, сайтра кирлӗ ваттисен сӑмахне шыраса тупма ҫӑмӑл — ятарлӑ шырав пур, тата унсӑр пуҫне вӗсене пайсем тӑрӑх вырнаҫтарнӑ.

Каласа хӑварар, ваттисен сӑмахӗсем шухӑша кӗскен те ҫивӗччен, ытарлӑн палӑртаҫҫӗ. Вӗсенче халӑхӑн кун-ҫулӗ, ӑс-хакӑлӗ, шухӑшлавӗ, тӗнчекурӑмӗ ӳкерӗннӗ.

#сайтсем, #юбилейсем, #ваттисем, #пултарулӑх, #кӗнекесем