Н.В. Фёдоров — хальхи президент

Кун пирки «Пӗрлӗхлӗ Раҫҫей» сайчӗнчи пресс-релизран пӗлме пулать. Патшалӑх Думин председателӗ Борис Грызлов пӗлтернӗ тӑрӑх Чӑваш Ен президенчӗн пуканӗ ҫине ларма виҫӗ ҫынна тӑратнӑ:

* Суслонова Нина Владимировна, Чӑваш Республикин министрсен кабинечӗн председателӗ. 1960 ҫулта Иркутск облаҫӗнче ҫуралнӑ;

* Тихонов Руслан Кронидович, Атӑлҫи федераллӑ округри Раҫҫей Федераци президенчӗн Чӑваш Республикӑри тулли праваллӑ представитель аппарачӗн тӗп федераллӑ инспекторӗ. 1955 ҫулхи утӑн 8-мӗшӗнче Канашра ҫуралнӑ;

* Игнатьев Михаил Васильевич, Чӑваш Республикин ял хуҫалӑх министрӗ, Министрсен кабинечӗн председатель ҫумӗ. Шупашкар районӗнчи Кӗҫӗн Турхан ялӗнче 1962 ҫулта ҫуралнӑ.

Николай Фёдоров хӑйне ҫак списока кӗртме ыйтман.

Виҫҫӗшне танлаштарсан Нина Суслонова ларас шанчӑк пысӑкрах. Астӑватӑр пулӗ вӑл нумай пулмасть председатель вырӑнне ларнӑччӗ — политикӑри пулӑмсем ахаль пулмасса пӗлнӗрен ку та приӗн Республикӑна малашне Нина Владимировна ертсе пыма пултарассине пӗлтерет. Николай Фёдоров та ӑна лартма сӗннӗ тет. «Пӗрлӗхлӗ Раҫҫей» списокӗнче те ун хушамачӗ малта.

«Ведомости» хаҫат пӗлтернӗ тӑрӑх Николай Васильевич малашне Раҫҫей Федераци президенчӗн Атӑлҫи е Ҫӗпӗр федераллӑ окргури тулли праваллӑ представитель вырӑнӗсене йышӑнма пултарать. Анатолий Квашнинӑн та, Григорий Рапотан та ҫулӗсем пысӑк — пӗри 65-ке ҫывхарать, тепри вӑл ҫулран иртнӗ те ӗнтӗ.

#суйлав, #политика