Шупашкар районӗнче юлашки ҫулсенче Акатуя тӗрлӗ ял тӑрӑхӗнче ирттереҫҫӗ. Кӑҫалхине хӑйсем патӗнче йӗркелессишӗн Кӑшавӑш, Ҫырмапуҫ, Сарапакасси тата Ҫӗньял-Покровски ял тӑрӑхӗсем заявка тӑратнӑ. Конкурсра ҫӗнтернӗ ял тӑрӑхне район хыснинчен 10 миллион тенкӗ уйӑрса параҫҫӗ. Вӑл укҫана вырӑнтисен хӑйсене кирлӗ пек, анчах, паллах, усӑллӑ тӑкаклама май килет.

Тунтикун ял тӑрӑхӗсен пуҫлӑхӗсемпе иртнӗ канашлура конкурса хутшӑнакан ял тӑрӑхӗсен пуҫлӑхӗсем укҫана тивӗҫсен ӑна ӑҫта яма шухӑшлани пирки каласа кӑтартнине пӗлтернӗ асӑннӑ районӑн "Тӑван Ен" хаҫат сайтӗнче.

Ҫырмапуҫсем, акӑ, Иккассинчи шыв скважинине юсама, Чӑрӑшкасси клубӗнчи спортзала ҫӗнетме ярас шухӑшлӑ пулнӑ.

Сарапакассисем Колешша ялне шыв кӗртме ӗмӗтленнине пӗлтернӗ. Унта ҫынсем ҫӑлтан шыв ӑсса пурӑнаҫҫӗ. Ун пекки Шупашкар районӗнче тек пӗр ялта та ҫук — пур ҫӗрте колонкӑран ӑсаҫҫӗ, хӑш-пӗр ялта килсерен пӳрте шыв кӗртнӗ. Канашлура ял тӑрӑхӗн пуҫлӑхӗ Павел Амурцев Шорккари шыв башин хӑвачӗ пӗчӗккине кура ку ыйтӑва та татасшӑннине пӗлтернӗ. Урамри ҫутӑ лампине энергие перекетлекеннипе ылмаштарас пирки те шухӑшлаҫҫӗ-мӗн.

Ҫӗньял-Покровскисем ҫичӗ ял урамӗсенче ҫул сарасшӑн. Ун валли вӗсене 6,5 миллион тенкӗ кирлине пӗлтернӗ. Ял тӑрӑхӗн пуҫлӑхӗ Рудольф Васильев Вашук ялне газ кӗртес ӗмӗтлине те пӗлтернӗ.

Мӗнех, Ҫӗньял-Покровскисем конкурсра ҫӗнтернине кура вӗсен шухӑш-ӗмӗчӗ пурнӑҫа кӗрейӗ. Районӑн кӑҫалхи Акатуйӗ асӑннӑ ял тӑрӑхӗнчи Пархикассинче иртӗ.

#Сарапакасси ял тӑрӑхӗ, #Ҫырмапуҫ ял тӑрӑхӗ, #уявсем, #Кӑшавӑш ял тӑрӑхӗ, #Ҫӗньял-Покровски ял тӑрӑхӗ, #Шупашкар районӗ, #культура, #Акатуй, #Вашук, #Пархикасси, #МИХсем