«Крепыш» ача пахчи умӗнчи территори

Шупашкар районӗн Депутатсен пухӑвӗн депутачӗсем район шайӗнче иртнӗ отчет пухӑвӗнче тротуар, канализаци, шкул ҫивиттине юсас, Кӳкеҫри урамсенчи хунарсен ыйтӑвне ҫӗкленӗ.

Халӑх тарҫисене район центрӗнчи «Ягодка» тата «Пӳрнеске» ача пахчисене пырса кӗмелли территорисенче юпасем ҫинче хунарсем ҫунманни пӑшӑрхантарать. Темиҫе ҫул каялла хута янӑ «Крепыш» ача пахчи патне пыма тротуар ҫукки ачисене ҫак учреждение ҫӳретекенсемшӗн тата вӑл урампа иртсе ҫӳрекенсемшӗн хӑрушлӑх кӑларса тӑратать. Район центрӗнче канализаци коллекторӗ тӑвас, поселокри лицей ҫивиттине юсас ыйту пирки те сӑмах пуҫарнӑ депутатсем.

Район центрӗн пуҫлӑхӗ В.В. Вершинин «Крепыш» ача пахчи патне тротуар сарма хыснара укҫа пӑхса хӑварнине ӗнентернӗ. Маларах асӑннӑ ача пахчисем патӗнче ҫутӑ кирлине те поселокри тӳре-шара пӗлет-мӗн — ҫуркунне хунарсем вырнаҫтарӗҫ.

Лицей ҫивиттине юсамаллине вара районти тӳре-шара та пӗлет. Шупашкар район админиcтрацийӗн пуҫлӑхӗ Г.И. Егоров каланӑ тӑрӑх, ҫивиттин конструкцийӗн хӑйне евӗрлӗхне пула епле юсамалли пирки пуҫ ватаҫҫӗ. Канализаци коллекторӗ пирки Георгий Иванович поселокра ҫӗнӗрен те ҫӗнӗ ҫуртсем хута кайсан та халӑх шучӗ чакнине пӗлтернӗ. Депутатсем вара урӑхларах шухӑшлаҫҫӗ-мӗн: поселокра хальхи вӑхӑтра хӑпартакан нумай хутлӑ ҫуртсенче ҫынсем пурӑнма тытӑнсан халӑх йышӗ хутшӑнӗ те канализаци тытӑмӗ мӗнпур таса мар шыва тасатса ӗлкӗреймӗ.

#ҫурт-йӗр, #Шупашкар районӗ, #депутатсем, #тӳре-шара, #ача пахчисем, #Кӳкеҫ, #ҫул-йӗр