Кӗрхи тырӑ лайӑх хӗл каҫнӑ

Ака уйӑхӗн вӗҫӗнче, 30-мӗш кунӗнче, Чӑваш Ен Президенчӗ Михаил Игнатьев Патӑрьелпе Каҫал тӑрӑхӗсене ҫитсе унти ҫураки ӗҫӗ епле пынипе паллашрӗ. Кун пирки Президент администрацийӗн пресса хӗсмечӗ пӗлтерет.

Чи малтанах Михаил Васильевич Патӑрьел районӗнчи «Малалла» хуҫалӑхри (ытларах сухан лартса тӑваҫҫӗ) ӗҫсемпе кӑсӑкланчӗ — ҫуртри акасси мӗнле пынипе тата кӗрхи тырӑ епле хӗл каҫнипе паллашрӗ. Механизаторсемпе калаҫнӑ май Президент ял хуҫалӑхӗнче ӗҫлекенсене пулӑшу парса тӑмалли пирки сӑмах каларӗ. Ҫавӑн пекех ӑна сӗрмелли-ҫунтармалли шӗвекпе йӳнӗлле тивӗҫтересси епле пыни кӑсӑклантарчӗ. Асилтеретпӗр, «НК «Роснефть» АУО пирӗн республикӑри ял хуҫалӑхӗнче тӑрӑшакансене пурӗ йӳнӗрех хакпа 16 600 тонна пама килӗшнӗ. Сӗрмелли-ҫунтармалли шӗвеке Чӗмпӗрти нефть базинчен тоннӑшӑн 16 200 тенкӗ тӳлесе турттараҫҫӗ. Ҫапла май пӗр литр дизтопливо, сӑмахран, ҫул тӑршшӗне кура 14-15 тенке ларать. «Малалла» хуҫалӑха илес пулсан, вӗсем 23 пин литр туяннӑ та ӗнтӗ.

«Малалла» тата «Первомайск» хуҫалӑхсенче кӑҫал тырра 1000 гектарта акма планланӑ, 44,6% сухаласа та пӗтернӗ ӗнтӗ. 25 гектар сухан лартнӑ. Ҫӗрулмине 120 гектарта лартма палӑртнӑ, хальхи вӑхӑтра ӑна суйлаҫҫӗ.

Малалла Михаил Васильевич ҫулӗ Комсомольски районне выртрӗ. «Труд» ЯХПК председателӗ Василий Николаев пӗлтернӗ тӑрӑх, кӑҫал 950 гектар ҫӗр ҫинче тырӑ акма палӑртнӑ, 350 гектарти ӗҫе пурнӑҫланӑ та ӗнтӗ. Комсомольски районӗн администраци пуҫлӑхӗ Геннадий Волков хӑйӗн сӑмахӗнче районта ҫӗрулмие 2500 гектарта лартса ӳстерме палӑртни пирки каларӗ, 2300 гектарлӑх вӑрлӑх та пур иккен. «Слава» ЯХПК ертӳҫи Михаил Буслаев хӑйӗн хуҫалӑхӗпе паллаштарнӑ май кӗрхи тырра 300 гектарта лартни пирки пӗлтерчӗ. «Слава» кооперативӗнчи ӗҫсем малалла кӑлтӑксемсӗр пыраҫҫӗ, вӗсене вӑхӑтра туса пӗтерессе шанчӑк пур.

Ӗҫлӗ ҫулҫӳреве вӗҫленӗ май Президент «Искра» колхозра урпа акас ӗҫ епле пынипе паллашрӗ. Михаил Игнатьев пурне те ӑнӑҫуллӑ та хастарлӑ ӗҫлеме, тыр-пула тухӑҫлӑ туса илме сунчӗ.

Сӑнсем

Видео

#Патӑрьел районӗ, #Комсомольски районӗ, #ял хуҫалӑхӗ