Ял кунӗнче

Шӑматкун, утӑн 30-мӗшӗнче, Етӗрне тӑрӑхӗнче вырнаҫнӑ Анатри Явӑшра уяв иртрӗ — Ял кунне палӑртрӗҫ.

Анатри Явӑш ялне XVIII ӗмӗрте никӗсленӗ, куҫса килекенсем Мӑн Явӑш ялӗнчен пулнӑ. Вӗсем тӗп ялтан тухса Хурашаш шывӗ хӗрринче хӑйсем валли вырӑн тупнӑ пулнӑ.

Уява салам сӑмахӗсемсӗр иртмерӗ — пӗрисене нумай ача пӑхса ӳстернӗшӗн, теприсене хуҫалӑха лайӑх тытса пынишӗн, виҫҫӗмӗшӗсене 50 ҫул ытла пӗрле мӑшӑрланса пурӑннӑшӑн. Вӑрҫӑпа тыл ветеранӗсене те манмарӗҫ — вӗсем те ял тӑрӑх администрацийӗнчен чаплӑ парнесене тивӗҫрӗҫ. Ӑмӑртусем те пулчӗҫ — ачасем асфальт ҫинче пурапа ӳкерчӗҫ, ҫӳҫ-пуҫ илемӗпе тупӑшрӗҫ (мала 3 хӗрача тухрӗ: Беловсен Аннӑпа Настя тата Алина Васильева).

Юрӑ-ташӑсӑр уяв, паллах, иртмерӗ — Мӑн Явӑш ял тӑрӑхӗнчи «Вылӑ» фольклор ушкӑнӗ, Кивӗ Тинкеш ял тӑрӑхӗнчи ушкӑн, Элӗк районӗнчи хӑнасем пулчӗҫ. Шупашкартан вара ятарласа эстрада ҫӑлтӑрӗсем килнӗччӗ: Валентина Кузнецова, Валерий Клементьев, Григорий Федоров.

Спортсӑр хальхи вӑхӑтра ял кунӗсем иртмеҫҫӗ — ял халӑхӗ волейболла вылярӗ, ҫемьесем хушшинче эстафета ирттерчӗҫ, кире пуканне йӑтса ӑмӑртрӗҫ тата ытти те. Ҫӗнтерӳҫӗсем парнесемсӗр, ял тӑрӑхӗн грамотисемсӗр юлмарӗҫ.

Ял кунӗ халӑхне питӗ килӗшрӗ. Савӑнӑҫлӑ уяв каҫчченех тӑсӑлчӗ — дискотекӑпа вӗҫленчӗ.

#Ял кунӗсем, #Етӗрне районӗ, #Мӑн Явӑш ял тӑрӑхӗ, #Анатри Явӑш, #уявсем