«Хавал» чӑваш чӗлхи 10-мӗш уйлӑхне йыхравлаҫҫӗ. Вӑл ҫӗртме уйӑхӗн 30-мӗшӗнчен пуҫласа утӑ уйӗхӗн 7-мӗшӗччен «Сурские Зори» кану базинче (Етӗрне районӗ) иртӗ. «Хавал» уйлӑха чӑваш чӗлхине вӗренме Раҫҫейӗн тӗрлӗ кӗтесӗнчен тата юр ҫӗр-шывран та хӑнасем килеҫҫӗ.

Уйлӑха «Хавал» пуҫару ушкӑнӗ, «Ӑнӑҫу чӗлхи» (выр. «Язык для успеха») ют чӗлхесен шкулӗ тата "Хыпар" Издательство ҫурчӗн «Ҫамрӑксен хаҫачӗ» редакци йӗркелеҫҫӗ.

«Хавал» уйлӑхра чӑваш чӗлхине виҫӗ шайра вӗренме май пур. Ача-пӑча тата ҫамрӑксем валли уйрӑм вӗренӳ йӗркелӗҫ. 3-10 ҫулхи ачасем валли уйрӑм программа пулӗ.

Кӑҫалхи уйлӑхӑн тӗп хӑни – Гиннес рекорчӗсен кӗнекине кӗнӗ, тӗрлӗ чӗлхепе юрлакан хрантсус юрӑҫи, эсперантист, окситан чӗлхине аталантаракан Жан-Марк Леклер (Йомо). Вӑл Францири тӗрлӗ регион чӗлхисем мӗнле лару-тӑрура пулни ҫинчен каласа парӗ. Ҫавӑн пекех уйлӑхра Эктор Алос-и-Фонт (Барселона – Шупашкар) социолингвист, Тухватуллин Айрат Халитович (Хусан федераци университетӗнчи истори факультечӗн доценчӗ, Тутар республикин Истори институчӗн ӑслӑлӑх ӗҫченӗ), Федоринчик Арцем Сергеевич (Тимукка) (Кийӳ - Шупашкар) пулӗҫ. Вӗсем семинарсем ирттерӗҫ, лекцисем вулӗҫ.

Кунсӑр пуҫне чӑваш тӗрри тӗрлеме, чӑваш халӑх юрри-ташшине, окситан ташшине ташлама вӗренме май пулӗ. Кашни каҫ концерт, спектакль лартма планланӑ. Спорт ӑмӑртӑвӗсем те пулӗҫ. Пӗр кун экскурсие кайса килме уйӑрса парӗҫ.

Уйлӑха хутшӑнма тӳлевлӗ. Тӗрлӗ сӑлтава пула уйлӑха ҫитеймерӗр пулсан йӗркелӳ укҫине тавӑрмаҫҫӗ. Пурӑнма тата апатланма уйӑрнӑ укҫине ҫеҫ каялла тавӑрӗҫ. Ытларах ыйтса пӗлес тетӗр пулсан ҫак телефон номерӗпе шӑнкӑравлама пултаратӑр: 89023285051 .

Уйлӑх йӗркелӳҫисем:

Алапрух (Блинов Александр) al.blinov@gmail.com, +79023285051

Айтар (Степанов Александр) uyav@mail.ru, +79053476427.

#чӑваш чӗлхи, #уйлӑхсем, #Етӗрне районӗ