Вӑрнар районӗнче пурӑнакан 44 ҫулти хӗрарӑма ывӑлне тивӗҫлӗ воспитани паманшӑн, пӑхманшӑн судпа айӑпласшӑн. Следовательсем пӗлтернӗ тӑрӑх, ниҫта та нумай вӑхӑт ӗҫлемен ҫак хӗрарӑм 2010 ҫулта ҫуралнӑ ачине хӗненӗ. Уйрӑмах – хӑй ӳсӗр пулнӑ чухне. Ку 2017 ҫулхи нарӑсран пуҫласа кӑҫалхи кӑрлаччен пулнӑ.

Амӑшӗ ывӑлӗ пур чухнех эрех-сӑра ӗҫнӗ, ҫапла майпа вӑл ӑна япӑх тӗслӗх кӑтартнӑ. Ку кӑна мар, ача килте пӗчченех юлкаланӑ. Амӑшӗ ӑна ҫӗрлесерен те хӑварма хӑраман. Ҫавна май арҫын ачан пӗр вӑхӑт тӑванӗсем патӗнче пурӑнма тивнӗ.

Аслӑ ачисем чӑтайман – юлашки тӗслӗх хыҫҫӑн вӗсем кун пирки йӗрке хуралне пӗлтернӗ. Амӑшӗ хӑйӗн айӑпне йышӑннӑ. Халӗ ӑна амӑшӗн прависӗр хӑварас ыйтӑва пӑхса тухаҫҫӗ. Ача вара аслӑ пиччӗшӗ-аппӑшӗпе пурӑнать.

#Вӑрнар районӗ, #ачасем, #судсем