marpos.cap.ru сӑн ӳкерчӗкӗ

Сӗнтӗрвӑрри район администрацийӗн пуҫлӑхӗ республикӑн министерствисенчен пӗри асӑрхаттарнине итлемен.

Чӑваш Енӗн прокуратурин пресс-службинче пӗлтернӗ тӑрӑх, республикӑн Строительство, архитектура тата ҫурт-йӗрпе коммуналлӑ хуҫалӑх министерстви Сӗнтӗрвӑрри район администрацийӗн пуҫлӑхӗ ячӗпе асӑрхаттару хучӗ шӑрҫаланӑ. Хула стиоительствин саккунӗпе ҫыхӑннӑ кӑлтӑка надзор органӗ тӗрӗслев вӑхӑтӗнче тупса палӑртнӑ. Ҫавӑн пирки ЧР Стройминӗ район администрацийӗн пуҫлӑхне маларах асӑрхаттарнӑ-ха. Апла пулин те хайхискер Строймин каланине итлемен, хушнине палӑртнӑ вӑхӑтра пурнӑҫлама васкаман.

Кӑлтӑка тупса палӑртсан Чӑваш Ен прокуратури административлӑ майпа ӗҫ пуҫарнӑ. Ҫак ӗҫ суда ҫитнӗ. Унта пуҫлӑх хӑй ӗҫлесе ҫитерейменнине тунман. Тӳре пуҫлӑха штрафлама йышӑннӑ.

Сӗнтӗрвӑрри район администрацийӗн пуҫлӑхӗнче хальхи вӑхӑтра Анатолий Мясников тӑрӑшать.

#тӳре-шара, #Строймин, #судсем, #яваплӑх, #Сӗнтӗрвӑрри районӗ, #прокуратура