Европӑри ҫӑмӑл атлетикӑн Ассоциацийӗн Бухарестра иртнӗ ларӑвӗ 2014 тата 2015 ҫулта ҫӑмӑл атлетика енӗпе Европӑри командӑсен чемпионатне ирттерме тивӗҫ хуласене палӑртрӗ.

Европа ӑмӑртӑвне ирттерме кӑмӑл тунисен йышӗнче 9 хула пулнӑ. Германири Брауншвейг ыттисенчен пур енӗпе те вӑйлӑрах пулнӑ, ӑмӑртӑва 2014 ҫулта ирттерме ҫӗнсе илнӗ. Шупашкар та унран кая маррине кӑтартса панӑ. 2015 ҫулта ҫӑмӑл атлетика енӗпе Европӑри командӑсен чемпионатне ирттерме тивӗҫ пулчӗ.

Республика умӗнчи паянхи тӗллев — чемпионата хатӗрленесси. Европӑн ҫӑмӑл атлетика пӗрлешӗвӗн членӗсем пӗр саслӑн пулса Шупашкар хули чемпионат ирттерме тивӗҫлине пӗлтернӗ пулин те тумалли сахал мар-ха. Тӗп ҫитменлӗхрен пӗри — хулан Европӑпа тӳрремӗн ҫыхӑну ҫукки. Шупашкар аэропорчӗ ыттисенчен кая мар пулин те ҫак ыйтӑва татса пама ҫӑмӑлах мар. Ҫавӑнпа 2015 ҫулта Мускавпа Хусана ҫӳрекен автобуссен хушма маршручӗсене йӗркелеме палӑртаҫҫӗ. Тепӗр чӑрмав — спортсменсемпе курма килекенсене вырнаҫтарма хӑна ҫурчӗ сахалли. Малтан палӑртнӑ тӑрӑх ӑмӑрту ирттернӗ чухне чылай ҫын пулӗ: ҫӑмӑл атлетсен йышӗнчех кашни ушкӑнра 25 хӗрарӑмпа 25 арҫын пулмалла, журналистсемех 500 яхӑн. Ку енӗпе халех ӗҫлеме тытӑннӑ: хулара ҫӗнӗ пысӑк ҫурт ҫӗкленет. Ҫӑмӑл атлетика пӗрлешӗвӗн членӗсем ҫулла Шупашкарпа паллашма килсен стадионсене ырланӑ пулин те хула пуҫлӑхӗсем вӗсене хӑтлӑлатма шантараҫҫӗ.

Чемпионата хатӗрленсе хулара мӗнлерех спорт керменӗсем тумаллине палӑртнӑ. Ҫак ӗҫ пуҫланнӑ теме те юрать: Афанасьев урамӗнче маунтинбайк центрне тума пикеннӗ, ҫитес вӑхӑтра физкультурӑпа спорт комплексӗн строительстви пуҫланмалла. Пӑр кермен те ҫитес ҫулта спорта юратакансене йышӑнӗ, «Атӑл» стадиона ҫӗнетӗҫ.

Чемпионатӑн хӑйӗн логотипӗпе талисманӗ те пулӗ, вӗсене конкурс ирттерсе ҫирӗплетӗҫ.

#Шупашкар, #спорт, #ҫӑмӑл атлетика