ШӖМ тунӑ сӑн

Нарӑсӑн 1-мӗшӗнче Ҫӗнӗ Шупашкарти Терешкова урамӗнчи пӗр ҫуртра, виҫҫӗмӗш хутра, ҫулӑм тухнӑ. Инкек вырӑнне патрулировани маршрутӗнчен ШӖМ ӗҫченӗ Артем Петров ҫитнӗ.

Хваттерӗн тимӗр алӑкӗ хупӑ пулнӑ. Кӳршисем унта пурӑнакан арҫынна кӑшкӑрнӑ, алӑкран шакканӑ – лешӗ сасӑ паман. Ҫӑлавҫӑсем хваттере кӗме пусма лартнӑ вӑхӑтра арҫыннӑн амӑшӗ ҫитнӗ, алӑка уҫнӑ. Артем Петров полицейски тӗтӗм-сӗрӗмпе тулнӑ пӳлӗме чупса кӗнӗ те арҫынна урама кӑларнӑ. Лешӗ сӗрӗмпе наркӑмӑшланнӑран хӑй тӗллӗн утайман.

Полицейски васкавлӑ медпулӑшу чӗннӗ. Тухтӑрсем 39 ҫулти арҫынна кислород маски тӑхӑнтартнӑ та пульницӑна илсе кайнӑ. Халӗ унӑн пурнӑҫӗ хӑрушлӑхра мар.

#Ҫӗнӗ Шупашкар, #полицейскисем, #пушарсем, #ҫӑлавҫӑсем