Чӗмпӗрти «1 Мая» Культура керменӗнче чӑвашсен пысӑк уявӗ «Кӗр сӑри» иртрӗ. Ӑна Чӗмпӗр хулин культура управленийӗ, ҫак округри депутат Николай Лазарев, «Еткер» телекaларӑм редакторӗ Олег Мустаев йӗркелерӗҫ.

Пысaк Культура керменӗнче нумай ҫын пуҫтарса Кӗр сaри уявне кӑҫал ҫиччӗмӗш хут йӗркелерӗ «Еткер». Ҫак вӑхӑтра уява кӑпӑклӑ сӑра вӗретсе килекенсен шучӗ те ӳсрӗ. Галина Галкина (Ишевкке), Ирина Аксёнова (Ҫӗнӗ хула), Силиса Мустаева (Чӗмпӗр хули), Валентина Крылова (Чӗмпӗр районӗ, Михайловка ялӗ), Елена Лянкина (Чӑнлӑ районӗ, Садки), Ирина Улюшева (Чӗмпӗр районӗ, Отрада), Тамара Головина (Аслӑ Нагаткин) кӑпӑклӑ сӑрапа кӑна мар, чӑваш апат-ҫимӗҫӗпе — куклипе, пӳремечпе, тӑварлӑ ҫупа, шӑрттанпа, икерчӗпе, кӗрхи ҫуллӑ хур-кӑвакал ашӗпе пухӑннисене сӑйларӗҫ. Тутлӑ ҫимӗҫе, техӗмлӗ сӑрана хаклӑ хӑнасем те хаваспах тутанчӗҫ. Уяв халӑхне фойере Валентина Тарават ертсе пыракан «Шанӑҫ» ансамбль юррисемпе савӑнтарчӗ. Пётр Яковлев купӑcҫӑ купӑсне тӑсса ярсан вара ташламасӑр чӑтса тӑракансем сахал пулчӗҫ.

Уява йӗркелекенсен парнине кашни конкурсант тивӗҫрӗ. Сӑрасен пахалӑхне уява килнӗ ҫынсенчен суйланӑ (хӑйсен ирӗкӗпе тухнӑ) жюри хакларӗ. Пӗрремӗш вырaна Елена Лянкина тата Валантина Крылова тивӗҫрӗҫ. Вӗсене кӗске хумлӑ кӑмака парнелерӗҫ. Иккӗмӗш вырӑншӑн — Силиса Мустаевапа Ирина Улюшевана — сӗткер пӑчӑртаса кӑлармалли машина (соковыжималка), виҫҫӗмӗшшӗн — Галина Галкинапа Тамара Головинана — электрочейник парнелерӗҫ. Ирина Аксёнова ятарлӑ приза тивӗҫрӗ.

Чӑвашсене уявпа саламлама Чӗмпӗр хула пуҫлӑхӗн Марина Беспалован ҫумӗсем, Сергей Панчин тата Игорь Буланов депутатсем килсе ҫитрӗҫ. Чaвашсем ҫӗнӗ тыр-пултан пӗҫернӗ ҫӑкӑрӗпе кӑпӑклӑ сӑрине тутанса пӑхрӗҫ, кунта киличчен Интернетра Кӗр сӑри пирки тӗплӗн вуласа пӗлнине, ҫакӑн пек ӗҫчен те тараватлӑ, савӑнма пӗлекен халӑха чунтан хисепленине палӑртрӗҫ. Кӗрхи сӑра уявӗ Чӑваш Республикипе Чӗмпӗр хушшинчи культура ҫыхӑнӑвне те ҫирӗплетет. Ҫакна палӑртакан пӗр пулӑм — ЧР культурӑпа архив ӗҫӗсен министерстви Марина Беспалована янӑ Тав Хучӗ. Шупашкарти Ҫеҫпӗл Мишши фончӗн пуҫлӑхӗ Валери Туркай тата Николай Григорьев усламҫӑ Марина Беспалована тухьяпа ама (кӑкӑр умне ҫакмалли) тата чӑваш тӗррипе илемлетнӗ тутӑр парнеленӗ.

Шупашкартан килнӗ эстрада юрӑҫисен — Владимир Леонтьев, Алёна Алексеева, Надежда Юрпи, Альбина Пӑрчӑкан, «Голливуд» ташӑ ушкӑнӗн анлӑ концерчӗпе уяв малалла тӑсӑлчӗ. Ӗҫрӗ-ҫирӗ, юрларӗ-ташларӗ, чун каниччен савӑнчӗ чӑваш хӑйӗн авалтан пыракан уявӗнче.

#культура, #Чӗмпӗр, #Чӗмпӗр районӗ, #Кӗр сӑри, #Чӑнлӑ районӗ, #Михайловка, #Аслӑ Нагаткин