Чӑваш Енри полицейскисем Волгоград облаҫӗнчи каччӑна тытса чарнӑ. Вӑл тӗнче тетелӗнче хӗр ячӗпе регистрациленнӗ. Хӑйӗнпе паллашас тата тӗл пулас тенӗ каччӑран укҫа ыйтнӑ.

Ҫӗнӗ Шупашкарта пурӑнакан 22 ҫулти ҫамрӑк хулари полицейскисенчен пуш уйӑхӗн пуҫламӑшӗнче пулӑшу ыйтнӑ. Вӑл ӑнлантарнӑ тӑрӑх, тӗнче тетелӗнче ар ҫыхӑнӑвне кӗрес тӗллевпе хӗрпе паллашнӑ. Анчах унпа тӗл пулма ниепле те май килмен. Пике курнӑҫу вӑхӑтне пӗрмай куҫарнӑ. Ҫав вӑхӑтра каччӑ хӗре 51 пин тенкӗ куҫарса пама ӗлкӗрнӗ. Лешӗ укҫана тӗрлӗ сӑлтавпа ыйтнӑ.

Каччӑпа паллашасшӑн хӗр пек суйса пӗлтерӳ пичетлекенни Волгоград облаҫӗнчи 18 ҫулти каччӑ пулнӑ. Ӑна Шалти ӗҫсен министерствин пуҫиле шырав ӗҫченӗсем тупса палӑртнӑ. Пирӗн патри йӗрке хуралҫисем ҫав тӑрӑха ятарласа кайнӑ, ҫамрӑка тытса чарнӑ. Каччӑ укҫана тавӑрса панӑ.

#пӑтӑрмахсем, #ултавсем, #ШӖМ, #ҫамрӑксем, #Волгоград облаҫӗ, #укҫа-тенкӗ