Лаврентий Таллеров

Паян, пушӑн 15-мӗшӗнче, Чӑваш халӑх ҫыравҫи Лаврентий Таллеров ҫут тӗнчерен уйрӑлса кайнӑ.

Сывпуллашу вырсарникун Шупашкарти Граждансен урамӗнчи 19 ҫуртра («Ритуальные услуги» МУП) 14-15 сехетсенче пулӗ.

Таллеров Лаврентий Васильевич 1929 ҫулхи кӑрлачӑн 27-мӗшӗнче Нӗркеҫ ялӗнче (Комсомольски районӗ) ҫуралса ӳснӗ. 1976 ҫултанпа СССР ҫыравҫӑсен пӗрлешӗвӗн пайташӗ. Чӑваш халӑх ҫыравҫи (1988), Чӑваш Республикин тава тивӗҫлӗ культура ӗҫченӗ (1981). Чӑваш театрӗсенче вылякан тата ӗҫлекен артистсемпе режиссерсен пултарулӑхне тӑтӑш ҫутатса тӑнишӗн ӑна Ҫемен Элкер ячӗллӗ премине панӑ.

Лаврентий Васильевич Ҫӗнӗ Кипеҫри вӑтам шкулта вӗреннӗ. Ӗҫленӗ хушӑрах Елабугӑри (Тутарстан) библиотека техникумне пӗтернӗ. Нумай ҫул хушши районти «Октябрь ялавӗ» хаҫат редакторӗ пулнӑ. 1969 ҫулта Шупашкара куҫса килнӗ. Вунӑ ҫула яхӑн «Коммунизм ялавӗ» хаҫат редакцийӗн культура, литературӑпа ӳнер пайне ертсе пынӑ. Унтан «Тӑван Атӑл» редакцине ӗҫлеме куҫнӑ, явӑплӑ секретарь, тӗп редактор ҫумӗ пулнӑ, 1985-1989 ҫулсенче тӗп редакторта ӗҫленӗ.

Паллӑ кӗнекисем: «Хурӑн шывӗ» (1975), «Култарам-ха арӑмран» (1977), «Юхать юханшыв» (1978), «Сӑпка юррисем» (1979), «Ҫӑлтӑр витӗр ҫул курӑнать» (1983), «Хӗвел ҫаврӑнӑш — ылтӑн ҫӳҫ» (1986), «Эрхип мӑнукӗ Эрхип» (1992), «Йӗркеллӗ ҫын асапӗсем», «Шеремет» тата ыттисем.

#ҫухатусем, #Шупашкар, #Комсомольски районӗ, #Нӗркӗҫ