Ӗлӗк-авалхи вӑхӑтра пирӗн чӑваш халӑхӗн ӗҫ-хӗлпе тата ҫутҫанталӑкпа ҫыхӑннӑ тӗрлӗ йӑла-йӗркесем чылай пулнӑ. Вӗсен хушшинче — ҫӑварни. Ҫак уяв йӑлисене аса илсе тата малалла тӑсас тӗллевпе Хырхӗрри ӳнер ҫурчӗпе тӗп шкулӗн ӗҫченӗсем ҫӑварни ирттерчӗҫ. Культура ҫурчӗ умне халӑх чылаях пуҫтарӑнчӗ. Уява тӑван ен культурине вӗрентекен Г.А.Белкова уҫрӗ, Хырхӗрри ял тӑрӑхӗн пуҫлӑхне А.Н.Воробьева сӑмах пачӗ. Анатолий Николаевич пуҫтарӑннисене салам сӑмахӗ каласа уява тулли кӑмӑлпа ирттерме сунчӗ. Сцена ҫине Хырхӗрри тӗп шкулӗнче вӗренекен ачасем тухса сӑвӑсем каларӗҫ. Унтан ӳнер ҫурчӗ ҫумӗнчи «Палан» фольклор ушкӑнӗ ҫӑварни юррисене илемлӗн шӑрантарчӗ. Ҫав вӑхӑтра ачасемпе ял ҫыннисем хӗл кӗлетки тавра ҫаврӑнса ташласа савӑнчӗҫ.

Уявра тӗрлӗрен спорт вӑййисем те пулчӗҫ. Вӗсене Вениамин Васильевич Белков спорт ветеранӗ ӗлӗкхи вӑйӑсемпе ҫыхӑнтарса выляттарчӗ, ӑна физкультура вӗрентекенӗ А.В. Гаврилов пулӑшса пычӗ. Чӑн малтан хӗрачасемпе хӗрарӑмсем атӑ-пушмак, арҫын ачасемпе арҫынсем урана калуш тӑхӑнса аяккарах ывӑтас енӗпе тупӑшрӗҫ. Унтан ушкӑнсене уйрӑлса вӗрен туртассипе хӗрӳ тупӑшу пуҫланчӗ, хӗрачасен ушкӑнне ҫитекенни пулмарӗ. Часах «сӑрт патши» («царь горы») вӑйӑ пуҫланчӗ. Юр сӑрчӗ ҫине икшерӗн хӑпара-хӑпара пӗр-пӗрне аялалла тӗртсе антарма тӑрӑшрӗҫ хутшӑнакансем. «Сӑрт патши» ята тӑххӑрмӗш класра вӗренекен М.Белков тивӗҫрӗ.

Ятарласа уява валли маттур хӗрсемпе кинемейсем икерчӗ тата ытти тутлӑ ҫимӗҫсем хатӗрлесе-пӗҫерсе килнӗ. Сӗтел ҫинчи сӑмаварсем те пӑсланса ҫеҫ тӑчӗҫ. Кашниех семлӗ ҫимӗҫе тутанса пӑхма тӑрӑшрӗ. Авалхи йӑлана пӑхӑнса хӗл кӳлепине тивертсе ҫунтарса янипе уяв вӗҫленчӗ. Ял-йышсем вара уяв ӑшшипе савӑк кӑмӑлне хӑйсемпе пӗрле илсе кайрӗҫ.

#Ҫӑварни, #уявсем, #Комсомольски районӗ, #Хырхӗрри, #шкулсем