Чӑваш Республикинче паянхи кун та самаях ҫивӗч ыйту вӑл — шкула ҫулне ҫитмен ачасене ятарлӑ учрежденисене вырнаҫтарасси. Кӑҫалхи ҫулпа тӳр килсе республикӑра 1-7 ҫулхи ачасен проценчӗ 70,6% таранах ҫитет. Кӑрлач уйӑхӗн 1-мӗшӗнчи кӑтарту тӑрӑх ача пахчине вырнаҫма черет тӑракансен шучӗ 1,5 ҫултан иртнӗ 16 432 ача, вӗсенчен 91,3% 1,5–3 ҫула ҫитнӗ пепкесем.

Ҫак ыйтӑва татса парас тӗллевпе кӑҫал Чӑваш Енре 8 ҫӗнӗ ача пахчи хута ярас ӗҫ вӗҫленнине паллӑртнӑ, унсӑр пуҫне тата виҫҫӗшӗ реконструкци хыҫҫӑн хӑйӗн ӗҫне пуҫламалла. Ҫак ӗҫ-пуҫа пула ача пахчисенче 1 743 ҫӗнӗ вырӑн тупӑнӗ. Республикӑри вӗренӳ министерствинче пӗлтернӗ тӑрӑх тӗллеве пурнӑҫлама республика хыснинчен 366,6 млн., вырӑнти укҫа-тенкӗрен 140,4 млн укҫа уйӑрмалла.

Шупашкар хулинче пӗтӗмпе 2 ача пахчи уҫӑлӗ (475 вырӑн), ыттисем ҫак тӑрӑхсенче ӗҫлеме пуҫламалла: Комсомольски районӗнче — 2, Кӳкеҫре (Шупашкар районӗ, 240 вырӑн) тата Йӗпреҫпе Елчӗк (95 вырӑн) районӗсенче — пӗршер ача пахчи. Куславккапа (170 вырӑн) Муркаш (60 вырӑн) районӗсенче тата Ҫӗмӗрлепе Канаш (292 вырӑн) хулисенче ача пахчисене реконструкци хыҫҫӑн уҫмалла.

2012 ҫулта республикӑра ӗҫлеме тытӑннӑ ача пахчисем 3 514 вырӑн панӑ. Шкул ҫулне ҫитмен ачасен вӗренӗвне аталантарас ӗҫпе ятарлӑ программӑпа килӗшӳллӗн 2012–2015 ҫулсем хушшинче 54 ача пахчи хута ярса ӗҫлеттерсе ямаллине паллӑртнӑ.

#Куславкка районӗ, #Елчӗк районӗ, #шупашкар районӗ, #Кӳкеҫ, #Комсомольски районӗ, #ача пахчисем, #Шупашкар, #Муркаш районӗ, #Ҫӗмӗрле, #Канаш, #Йӗпреҫ районӗ