Пуҫ хунӑ Изосим Башкиров СОБР лейтенантне асӑнса Чӑваш Енре бокс енӗпе йӑлана кӗнӗ VIII ача-пӑчапа ҫамрӑксен турнирӗ иртнӗ. Турнир спецназ ҫар чаҫӗнче хӗсметре тӑнӑ ҫар ҫыннин тӑван тӑрӑхӗнче — Элӗк районӗнчи «Хӗлхем» спорт комплексӗн залӗнче иртнӗ.

Турнирта хисеплӗ хӑнисем шутӗнче Раҫҫей Геройӗ Евгений Борисов, СОБР командирӗ пулнӑ милици полковникӗ Юрий Григорьев, Чӑваш Республикин Росгварди тытӑмӗн «Искра» СОБР тата «Сувар» ОМОН боецӗсемпе ветеранӗсем, Чӑваш Республикин ШӖМӗн «Гром» отрячӗн боецӗсем, Изосим Башкировпа пӗрле хӗсметре тӑнисем, унӑн ҫывӑх ҫыннисемпе тусӗсем пулнӑ.

Пуҫ хунӑ спецназ ҫӑр ҫыннин паттӑрлӑхӗ ҫинчен турнир хӑнисене канӑва тухнӑ милици полковникӗ Юрий Григорьев каласа панӑ: «Ушкӑн перкелешӳ тӑрӑмне лексен, Изосим боевиксен темиҫе перкелешӳ вырӑнне пулеметпа персе ҫӗмӗрнӗ, хӑйне вара снайпер амантнӑ. Анчах аманнӑ пулин те хӑйӗн ҫине тимлӗх уйӑрас тесе, ытти аманнисене перкелешӳ уйӗнчен кӑларма май тӑвас тесе боевиксене пеме чарӑнман». Ятарлӑ ҫар чаҫӗн боецне асра тытса пӗр минут шӑп тӑнӑ.

Ӑмӑртусене Чӑваш Енри хуласемпе районсенчен 40-е яхӑн ҫамрӑк спортсмен хутшӑннӑ. Ҫӗнтерӳҫӗсемпе призерсене кубоксемпе, медальсемпе тата хаклӑ парнесемпе чысланӑ.

Пӗлме:

1996 ҫулхи пуш уйӑхӗн 6-мӗшӗнче Изосим Башкиров милици лейтенанчӗ, Чӑваш СОБРӗн пӗрлештернӗ отрячӗн йышне кӗрекенскер, засадӑна лекнӗ Липецкпа Чулхулари хӗсметҫӗсене пулӑшас тесе Грозный хулин «Минутка» лапамне тухса кайнӑ.

Вӑрттӑн тапӑннипе инкеке лекнӗ юлташӗсене чакма пулӑшас тесе офицер пулеметран персе хӳтӗленӗ, вырӑна ылмаштарнӑ чухне ӑна снайпер амантнӑ. Хӗсметри юлташӗсем аманнӑ спецназовеца перкелешӳ вырӑнӗнчен йӑтса тухнӑ, госпитале илсе ҫитернӗ, анчах ун пурнӑҫне ҫавах ҫӑлма май килмен.

Служба тивӗҫне пурнӑҫланӑ чухне кӑтартнӑ паттӑрлӑхпа хӑюлӑхшӑн Изосим Башкиров милици лейтенантне Паттӑрлӑх орденӗпе (вилнӗ хыҫҫӑн) чысланӑ.

#Чечня вӑрҫи, #вӑрҫӑсем, #спорт, #бокс, #ӑмӑртусем, #Элӗк районӗ