Чӑваш Енрен хутшӑннӑ хӑнасем

Ҫурлан 26–29-мӗшӗсенче Гагауз автономинче вырнаҫнӑ Копчак ялӑн уявӗ иртнӗ. Кӑҫал вӑл 222 ҫул тултарнӑ иккен. Йӑлана кӗнӗ тӑрӑх ҫак уява тӗрлӗ кӳршӗллӗ тӑрӑхсенчи хӑнасем пухӑннӑ — Турцирен, Болгарирен, Украинӑран, Раҫҫейрен, Румынирен.

Ҫак уявпа пӗрлех яланах Тӗрӗк халӑхӗсен конгресӗн вице-президенчӗсен кӗрекин канашлӑвӗ иртет. Сӑлтавӗ те паллӑ — шӑп ҫак ялта Тӗрӗк халӑхӗсен конгресӗ йӗркеленнӗ те ӗнтӗ. Раҫҫейрен канашлӑва Чӑваш Енпе (Чӑваш ҫамрӑкӗсен «Сӑвар» пӗрлӗхӗ) Тутарстанран хутшӑннӑ.

Уява уҫнӑ чухне хӑйне майлӑ ӑнсӑртлӑх пулса иртнӗ иккен. Копчак ял уявӗ пысӑк пӗлтерӗшли пирки асӑнтӑмӑр ӗнтӗ, ҫапла май унта АПШ, Турци, Болгари, Румыни патшалӑх посолӗсем те ҫитнӗ. Раҫҫейрен те килмелле пулнӑ иккен, анчах водителе пула вӑхӑта ҫитеймен пулать — ҫул ҫинче аташса-ҫухалса кайнӑ. Ҫапла вара Раҫҫей посолӗ тесе чӑваш ҫамрӑкӗсен «Сӑвар» пӗрлешӗвӗн ертӳҫине Олег Михайлович Цыпленкова пӗлтернӗ. Раҫҫей элчи те, кӑнтӑрлахи апат тӗлне ҫитейнӗ хыҫҫӑн ҫак лару-тӑрура пулӑшнӑшӑн Олег Михайловича тав тунӑ.

Уявӗ чӑн та лайӑх иртнӗ. Вӗҫленеспе концертпа савӑнтарнӑ — унта Турци, Боргари ушкӑнӗсем хутшӑннӑ. Чӑвашран та юрӑҫ пулнӑ — пирӗн халӑх юррисемпе «Янташ» ушкӑнра тата «Кӑмӑл» ҫемье фольклорӗн ушкӑнӗнче юрлакан Элпике (Аня) Егорова-чунташ паллаштарнӑ. Уйрӑмах «Оглан» гагауз халӑх юррин кӗввипе хывнӑ «Кӑлкан» (Алексей Наумов илемлетнӗ, А. Малышев сӑмахӗсем) чӑваш юррине пухӑннӑ халӑх лайӑх йышӑннӑ.

Уяв хуҫисем вӗсем патне килнӗшӗн пурне те тав турӗҫ. Чӑвашсемпе те яланах ҫыхӑнӑва тытса тӑма хатӗр пирки каларӗҫ — пирӗн халӑхсем хушшинчи пӗрлӗхе вӗсем манмаҫҫӗ иккен, астӑваҫҫӗ. Малашне те килме йыхравларӗҫ. Тепӗр ҫул хӑйсем те, пирӗн республикӑран йыхрав килсен, Республика кунне хутшӑнма шантарчӗҫ.

Сӑнсем («Однокласники» тетел, 243)

#уявсем, #Тӗрӗк халӑхӗсен конгресӗ, #Гагаузи, #Молдави, #элчӗсем