Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта ӗнер, Чӑваш тӗррин кунӗнче, вата ҫынсен ал ӗҫӗсен куравӗ уҫӑлнӑ.

Стрелоксен 324-мӗш дивизийӗ урамра вырнаҫнӑ «Манӑн социаллӑ центр» клубри курава пенсионерсем хӑйсен ӗҫӗсене ҫеҫ мар, амӑшӗсенчен юлнӑ пуянлӑха та илсе пынӑ.

«Аннен тӗрленӗ ӗҫӗсемпе кунти куравра ҫынсене паллаштарма май пурри мана питех те савӑнтарать», — тенӗ Галина Деомидова.

Николай Фролов мӑшӑрӗн Екатерина Сильвестровнӑн ӗҫӗсем пирки темччен каласа кӑтартма пултарать. Вӗсен килӗнче те ал ӗҫӗсем, чӑвашла тумлантарнӑ пуканесенчен пуҫласа минтер пичӗсем таранах, пур.

#чӑвашсем, #чӑвашлӑх, #куравсем, #уявсем, #ваттисем, #пултарулӑх