Кая юлса та пулин ҫак хыпара сире пӗлтерес: паян (пуш уйӑхӗн 28-мӗшӗнче) Красномармейскинчи Халӑх пултарулӑх ҫуртӗнче «Шетмӗпе Ҫавал кӗввисем» кункурсӑн иккӗмӗш пайӗ иртет. Вӑл шӑп та лӑп 18 сехетре паян пуҫланнӑ. Конкурса Шетмӗпе Ҫавал юханшывсем тӑрӑхӗнче вырнаҫнӑ районсенчи пултарулӑх ушкӑнӗсем хутшӑнаҫҫӗ Вӑл тӑрӑха Элӗк, Вӑрнар, Йӗпреҫ, Канаш, Красноармейски, Ҫӗмӗрле, Ҫӗрпӳ, Шупашкар, Сӗнтӗрвӑрри, Муркаш районӗсем кӗреҫҫӗ — ҫур республика!

Конкурсӑн пӗрремеш пайӗ иртнӗ ӗнтӗ — вӑл кашни районта пуш уйӑхӗн 26-мӗшӗнче пулнӑ. Кашни районтан чи лайӑх ушкӑна суйласа илсе вӗсене иккӗмӗш пайне кӗртеҫҫӗ.

Халӗ, ҫак хыпара ҫырнӑ вӑхӑтра, иккӗмӗш пайӗ пырать те ӗнтӗ. Хутшӑнакансен хӑйӗн пултарулӑхне кӑтартса 9 номинацире ҫӗнтерме тӑрӑшмалла: Чи чаплӑ хор произведенийӗ; вокал ушкӑлӗ валли ҫырнӑ чи чаплӑ произведени; пӗччен юрлакан валли ҫырнӑ чи чаплӑ произведени; ача-пӑча валли ҫырнӑ чи чаплӑ произведени; халӑх юррине чи лайӑх илемлетни; чи лайӑх юрлакан хор; чи лайӑх юрлакан юрӑҫ; чи лайӑх юрлакан вокал ушкӑнӗ; чи лайӑх эстрада юрри. Конкурса юлашки 10 ҫул хушшинче ҫырнӑ ӗҫсене кӑна тӑратма юрать.

Ыран-виҫӗмкун конкурсра кам ҫӗнтернине пӗлтерӗпӗр.

Конкурс страници

#Шетмӗпе Ҫавал кӗввисем, #Красноармейски, #конкурссем, #Сӗнтӗрвӑрри районӗ, #Шупашкар районӗ, #Ҫӗмӗрле районӗ, #Ҫӗрпӳ районӗ, #Канаш районӗ, #Красноармейски районӗ, #Вӑрнар районӗ, #Йӗпреҫ районӗ, #Элӗк районӗ, #Муркаш районӗ