Ларура / Тимӗр Акташ тунӑ сӑн

Чӑваш Республикин наци вулавӑшӗнче иртнӗ кӗҫнерникун, кӑрлачӑн 30-мӗшӗнче, Чӑваш наци конгресӗ ҫумӗнчи Ваттисен Канашӗн пухӑвӗ иртнӗ — кун пирки Тимӗр Акташ журналист пӗлтерет. Ӑна Виталий Станьял ертсе пынӑ.

Пухура орфографи ыйтӑвне пӑхса тухнӑ. Доклад калаканни Денис Гордеев ҫыравҫӑ пулнӑ — вӑл ҫак йӗркене «ҫӳлтен» хушнипе (эпир пӗлнӗ тӑрӑх Патшалах Канашӗ хирӗҫ сасӑланӑ) кӗртнине, хӑй вӑхӑтӗнче халӑх ӑна хирӗҫ пулнине (ЧНК вӑл вӑхӑтра сивленӗ) палӑртнӑ. Улшӑнусем хыҫҫӑн хӑш-пӗр сӑмахсене вырӑсла куҫарнӑ чухне йывӑрлӑхсем тухни пирки, ӑнланӑвне пӑтраштарма пултарни пирки каланӑ Денис Викторович.

Ку ыйтупах Виталий Станьял та сӑмах каланӑ. Хӑй докладне вӑл «Тимӗрҫӗн пуртти мӑка» ят панӑ. Виталий Петрович та малтанхи орфографи йӗрки патне таврӑнма ыйтнӑ, вӑл йӗрке академилле сӑмахсарсенче те хӑйӗн тӗрӗслӗхне кӑтартни пирки каланӑ.

Ларӑва Николай Егоров профессор хутшӑннӑ. Сӑмахсене уйрӑм ҫырассине ырлакансенчен пӗри пулнӑран вӑл ҫак йӗркене хӳтӗлеме тӑрӑшнӑ, анчах та ӑна итлекенсем пулман имӗш — ҫапларах пӗлтерет Тимӑр Акташ.

Ларӑва хутшӑннисем ятарлӑ чӗнӳ хатӗрленӗ, ӑна Патшалӑх Канашӗн председательне Юрий Попова пама йышӑннӑ.

Чӑваш чӗлхин орфографи ыйтӑвӗ мӗн улшӑнусем кӗртнӗ хыҫҫӑнах тавлашусем ҫуратать пулин те вӗсене паянхи кунччен те татса параймаҫҫӗ. Виҫӗм ҫул ку ыйтӑва чӑваш чӗлхи комиссийӗнче те ҫӗкленӗччӗ, анчах калаҫу шайӗнчен тухаймарӗ пулас ун чухне. Ку йӗрке 20 ҫул ытла тытӑнса тӑнӑран шкултан ку вӑхӑталла темиҫе ӑру вӗренсе тухнине те шута илме тивет. Ҫавӑнпах пулӗ Чӑваш патшалӑх университечӗн чӑваш чӗлхин кафедрин ӑҫчахӗсем те хальхи вӑхӑтра усӑ куракан орфографине улшӑнусем кӗртесшӗн мар.

#ларусем, #вулавӑшсем, #наци вулавӑшӗ, #Ваттисен Канашӗ, #ЧНК, #чӑваш чӗлхи