Ларура / Н. Плотников тунӑ сӑн

Маларах пӗлтертӗмер ӗнтӗ, ӗнер ЧНК Президиумӗн ларӑвӗ иртрӗ. Унта тӗрлӗ ыйтусем пӑхса тухрӗҫ. Чи малтанах районсенчи ЧНК вырӑнти уйрӑмӗсен ҫырнӑ Йӗрке-шывне (Положенине) сӳтсе яврӗҫ. Унти хӑш-пӗр кӑлтӑксене палӑртса ӑна пӗтӗмӗшле йышӑнас терӗҫ.

Ҫавӑн пекех тӗрлӗ комитетсем хӑйсен ӗҫӗ-хӗлӗ пирки каласа пачӗҫ — кунта эрех-сӑра ӗҫекенсемпе ӗҫленине те, ял уявӗсене ирттерессине те, тӗрлӗ юридици хучӗсене хатӗрлессине те (сӑмах май, ҫӗнӗ Устав хатӗр, ӑна бета-тӗрӗслев тунӑ хыҫҫӑн Президиума ҫитерӗҫ), тата ыттине те.

Ларура кӳршӗллӗ республикӑсенчи наци конгресӗсем епле ӗҫленине пӑхса тухрӗҫ — вӗсем пурте тенӗ пекх хӑйсен республикисен хыснинчен укҫа-тенкӗ илсе тӑраҫҫӗ имӗш. Тухса калаҫакансем — Валерий Клементьев ҫармӑссен опычӗспе паллаштарчӗ, Константин Яковлев пушкӑртсемпе тутарсен опычӗпе — ҫав мелпе кайсан аван пулнине палӑртрӗҫ.

Унсӑр пуҫне «Акатуй» уявне йӗркелесси епле пынине сӳтсе яврӗҫ. Кунта Президиум пайташӗ, вӑлах ЧР Культура министерствин пай пуҫлӑхӗ пулса тӑрӑшакан Сергей Казаков сӑмах илчӗ.

Конгресс ларӑвӗнче ҫавӑн пекех тӗрлӗ тӑрӑхсенчи чӑвашсем пӗр-пӗринпе килӗштерсе ӗҫлейменни пирки сӑмах сахал мар пуҫарчӗҫ. Ку енпе Самар тӑрӑхӗпе Пушкӑрт Республики уйрӑлса тӑраҫҫӗ имӗш. Самар тӑрӑхӗнче темиҫе культура пӗрлешӗвӗ пулнипе вӗсем пӗр-пӗринпе хирӗҫкелеҫҫӗ имӗш. Пушкӑртра та ҫывӑх вӑхӑтра, акан 18-мӗшӗнче, пуху пулмалла — унта Пушкӑрт Республикинчи чӑвашсен «Исполком Канаш» пӗрлешӗвӗн ертӳҫине — председательне — суйламалла. Хальхи вӑхӑтра вӑл вырӑна Валерий Сидоров йышӑнать. Сас-хура пӗлтернӗ тӑрӑх кандидатсенчен пӗри Юрий Михайлов шутланать. Вӑл ЧНК Президиумне те кӗрет (ӗнер ҫукччӗ вӑл). Ун кандидатурине вырӑнта ытлашшиех йышӑнсах каймаҫҫӗ пулас — лару вӗҫленес умӗн Президиум умӗнче Фёдор Кузьмин («Самана» продюссер центрӗн директорӗ) тухса калаҫрӗ. Суйлав унти чӑвашсене хирӗҫтерсе янӑ пулать, вӑл ЧНК-на ҫав хирӗҫӗве татса пама ыйтрӗ. Сӑмах май, ЧНК хӑйӗн ӗҫне вырӑнти хирӗҫӳсене пӗтерме тӑрӑшассине пӗлтерчӗ — конгреса темиҫе пӗрлешӳпе мар, пӗринпе ҫеҫ ӗҫлеме ҫӑмӑл пулнине каларӗ. Мирлештерес тесе вӑл тӑрӑхсене темиҫе те кайса килнӗ иккен. Ҫавах та Фёдор Кузьмин Пушкӑрта тепре ҫитсе килме ыйтрӗ.

#ЧНК, #чӑвашлӑх, #ӳсӗрсем, #ларусем, #Пушкӑртстан, #Самар облаҫӗ, #кӳршӗре, #Акатуй, #уявсем