Сӑкӑтри шкул ҫурчӗ

Патӑрьел районӗнчи Сӑкӑт шкулӗн 11-мӗш класӗнче вӗренекенсем Н.К. Тинюкова вӗрентекенпе пӗрле Анатолий Емельяновӑн «Хура кӑрӑҫ» кӗнекине тишкернӗ.

Хайлаври тӗп сӑнарӑн, Крисла Ҫеменӗн, ӗҫченлӗхӗ ачасене килӗшет-мӗн. Анчах ҫемье ӑшшине упрас, ача-пӑчана тӗрӗс-тӗкел пӑхса ӳстерес тӗллев мар унӑн. Укҫа-тенкӗ пухасшӑн ҫунать. «Укҫа-тенкӗ чирӗ ернӗ Ҫемен ҫынлӑха ҫухатать, кил ӑшши пирки шухӑшламасть», — тесе вӗренекенсем Крисла Ҫеменне сивленӗ.

Ачасем Крисла Ҫеменне хура кӑрӑҫпа танлаштарнӑ. Хура кӑрӑҫ — вӑрманта ӳсекен ҫирӗп те хытӑ кӑмпа. Анчах ҫак кӑмпан та ҫитменлӗхӗ пур: вӗтӗ хурт ерет те ҫак кӑмпа пӗтет. Крисла Ҫеменӗ те хура кӑрӑҫ пекех ҫирӗп те тӗреклӗ. Аварие лексен те сывӑ юлать, Лариван платник хытах хӗнесен те вилмест. Чунӗ те, сывлӑхӗ те хура кӑрӑҫ пек ҫирӗп. анчах Крисла Ҫеменне укҫашӑн ҫунни тата ӗмӗтсӗрлӗх тӗп тӑваҫҫӗ — ҫемйи арканать. Укҫа чирӗ шала каять. Укҫа вырӑнне укҫа пулӗ-ха, анчах ҫын вырӑнне ҫын пулмасть. Вилнӗ арӑмне тӑратса лартаймасть Ҫемен.

Ҫемье ӑшши пӗр-пӗрне ӑнланнинче, хисепленинче, тӗллевпе шухӑш-кӑмӑл пӗр килнинче никӗсленет. Пӗри хуҫа, тепри тарҫӑ пулмалла мар. Пур ӗҫе те пӗрле килӗштерсе тумалла. Ӗҫленӗ чух ӗҫлемелле, савӑннӑ чух савӑнмалла. Ача-пӑчана килтен сивӗтмелле мар, вӗсене тӗрӗс пурӑнма вӗрентмелле. Ку кӗнеке вулакана пурӑнма вӗрентет. Ҫапла пӗтӗмлетӳ турӗҫ хӗрсемпе каччӑсем урока вӗҫленӗ май.

#Патӑрьел районӗ, #Сӑкӑт, #шкулсем, #вӗренӳ, #кӗнекесем