Чӑваш халӑхне ҫутта кӑлараканӗ И.Я. Яковлев 1868 ҫулхи кӗркунне Чӗмпӗрте чӑваш шкулне никӗсленӗренпе 140 ҫул ҫитрӗ. Ҫак паллӑ куна уявлама 2008 ҫулхи чӳкӗн 21-мӗшӗнче Чӗмпӗр хулине Чӑваш патшалӑх университетӗнчен Вӗрентӳпе консультации пунктне делегаци тухса кайрӗ: ЧПУн чӑваш филологийӗпе культура факультечӗн деканӗ В.Г. Родионов профессор, Г.И. Федоров профессор, В.А. Абрамов доцент, В.А. Милютин доцент, «Ульяновск» хаҫат редакторӗ Л.И. Филиппова, «Хыпар» хаҫатра культура пайӗн редакторӗ Н. Смирнова, О.Н. Яковлева.

Чӗмпӗрти чӑваш шкулӗн никӗсӗнче академик Л.П. Кураков сӗннипе йӗркеленӗ ЧПУн Вӗрентӳпе консультаци пунктӗнче вӑй хуракансем уява килнисене ҫӑкӑр тӑварпа кӗтсе илчӗҫ. Савӑнӑҫлӑ уяв И.Я.Яковлев музейӗнче иртрӗ. Саламлама килнисем хушшинче Ульяновск облаҫӗн вӗрентӳ министерствинчен Ф.Т. Улендеева, Ульяновск облаҫӗнчи чӑвашсен наципе культура автономи исполкомӗн председателӗ В.И. Сваев пулчӗҫ. Вӗсем тухса калаҫнӑ май И.Я. Яковлев уҫнӑ шкулӑн пӗлтерӗшӗ иксӗлменнипе, ЧПУ ректорӗ Л.П. Кураков патриархӑн идейисене малалла аталантараканӗ пулнине палӑртрӗҫ. Ульяновск облаҫӗнчи чӑвашсен наципе культура автономийӗн исполкомӗ пархатарлӑ ӗҫсемшӗн Л.П.Кураков академике «Тав хучӗпе» чысларӗҫ.

Ларура ҫавӑн пекех В.Г.Родионов, В.А. Абрамов, В.В. Грузин, Г.И. Федоров, В.А. Милютин сӑмах илчӗҫ. В.А. Абрамов Чӗмпӗрти Ульяновск ячӗллӗ ЧПУ представительствин служба ертӳҫи, кӑҫал вӗренсе тухакансене дипломсем пачӗ. В.Г.Родионов хальтерех кӑна филологи ӑслӑлӑхӗсен кандидачӗ ята тивӗҫнӗ В.В.Грузина хаклӑ документ тыттарчӗ. Савӑнӑҫлӑ ларура чӑваш юрри те янӑрарӗ.

#юбилейсем, #Чӗмпӗр, #Чӑваш патшалӑх университечӗ