Нарӑсан 16-мӗшӗнче Чӑваш наци музейӗнче В.В. Николаев академик ҫуралнӑранпа 70 ҫул ҫитнине халалланӑ уяв иртрӗ. Ӑна К.В. Иванов ячӗллӗ историпе культура фончӗ (ертӳҫи — ист. Ӑслӑлӑхӗсен тухтӑрӗ В.П. Иванов) йӗркеленӗ.

Астӑватӑр пулӗ, ҫулталӑк ҫурӑ каялла Василий Васильевич пирӗнтен уйрӑлса кайрӗ.

В.В. Николаев — Пушкӑртра ҫуралнӑ чӑваш, техника ӑслӑлӑхӗсен тухтӑрӗ, 30 ытла изобретени, 70 ытла ӑслӑлӑх ӗҫ авторӗ, академик, Раҫҫей Федерацийӗн тава тивӗҫлӗ газ промышленоҫӗн ӗҫченӗ. Икӗ хутчен Чӑваш Республикин патшалӑх премине, ҫавӑн пекех Ӑренпур хулин хисеплӗ гражданинӗ ятне тивӗҫнӗ. Чылай хушӑ (1989 ҫултанпа) «Оренбурггазпром» пӗрлешӗвӗн ертӳҫи пулса ӗҫлерӗ вӑл. 90-мӗш ҫулсен вӗҫӗнчен пуҫласа чӑваш халӑхӑн историйӗпе культурине тӗпчес ӗҫе хастаррӑн хутшӑнчӗ — 10 кӗнеке кӑларчӗ. Вӗсенчен паллӑраххисем: «Чӑваш тумтирӗ: аваллӑхран паянлӑха» (Шупашкар-Ӗренпур-Мускав, 2003), «Чуваши: этническая история и традиционная культура» (Мускав, 2000), «История предков чувашей» (шел пулин те 7 кӗнекерен тӑракан ӗҫе вӗҫне ҫитереймерӗ, 3 кӗнеке ҫеҫ кӑларма ӗлкерчӗ), тата ыт. те. Василий Васильевич унсӑр пуҫне Пушкӑртпа Ӑремпурти чӑваш ентешлӗхӗсен ӗҫӗсене хастар хутшӑннӑ. Вӑл тӑрӑшнипех 2000 ҫулта К.В. Иванов ячӗллӗ историпе культура фончӗ йӗркеленчӗ.

Уяв вӑхӑтӗнче В.В. Николаев ячӗллӗ премийӗн пӗрремӗш лауриачӗсем паллӑ пулчӗҫ:

* А. Трофимов, ӳнер пӗлӗвӗн тухтӑрӗ;

* И. Тарасов, Пушкӑртстан журналисчӗ тата наци культурин ӗҫченӗ;

* Э. Бахмисов, Чӑваш наци музейӗн малтанхи директорӗ.

Ҫавӑн пекех чылайӑшӗ фондӑн хисеп грамотисемпе тав хучӗсене илме тивӗҫ пулчӗҫ.

#уявсем, #Чӑваш наци музейӗ