Нумаях пулмасть Ҫеҫпӗл ячӗллӗ тӗп вулавӑшӑн В.Маяковский ячӗллӗ филиалӗнче Марина Карягина пултарулӑхне халалланӑ каҫ иртрӗ. М.Карягина — сӑвӑҫ, тележурналист, ҫыравҫӑ — паянхи чӑваш сӑмахлӑхӗн анинче хӑйӗн вырӑнне тупнӑ ӗнтӗ. Нумайӑшӗ унӑн «Хум пӑшӑлтатӑвӗ», «Тӑваткал тӗлӗксем», «Ыт-и, тӗкел-и», «Юрӑсӑр уй», «Дорога за город» сӑвӑ, «Хура тумлӑ арҫын» прозӑлла хайлав кӗнекисене пӗлеҫҫех пулӗ. Журналистикӑри ҫитӗнӳсемшӗн М.Карягина 2009 ҫулта Ҫемен Элкер премине тивӗҫлӗ пулчӗ. Чӑннипех те кӗҫӗн ӑрӑва каласа памалли те, вӗрентмелли те пурах поэтӑн.

Пултарулӑх каҫне сумлӑ поэт-писательсем, тепчевҫӗсем, студентсемпе шкул ачисем пуҫтарӑнчӗҫ. Ю.Сементер, Р.Сарпи, А.Хусанкай, Е.Нарпи сӑмах каларӗҫ. А.Хусанкай критик, тӗслӗхрен, М.Карягина поэзире чӑваш чӗлхине ҫивӗч туйни, экспериментсем тума шикленменни, авалхи асаттесен сӑмахӗсемпе те хӑюллӑ усӑ курнине палӑртса хӑварчӗ.

Поэт сӑввисем тӑрӑх чылай композитор юрӑ кӗвӗленӗ. В.Александров кӗвӗленӗ «Туйӑнать кӑна пуль» юрра Валентина Михайлова питӗ хитре шӑрантарчӗ. Ҫавӑн пекех Чӑваш патшалӑх университечӗн чӑваш филологийӗпе культура факультетӗнче 3 курсра вӗренекен Света Чернова та М.Карягина сӑввисене юрра хывнӑ, хӑех юрларӗ те вӗсене. Асӑннӑ факультетри студентсем И.И. Иванов режиссёр ертсе пынипе поэт сӑввисене кӗвӗллӗ композици туса хатӗрленӗ-мӗн. Пухӑннисен умӗнче хайсен ӑсталӑхне кӑтартрӗҫ.

Ҫавӑн пекех 30-мӗш шкултан килнӗ ачасем сӑвӑ вуласа, М.Горшкова юрӑ юрласа саламларӗҫ пултарулӑх каҫне пухӑннисене. Вулавӑш ӗҫченӗсем (Н.М.Кузнецова, Т.Н.Уразаева) тӑрӑшнипе йӗркеленӗ пултарулӑх каҫӗ чӑннипех те чӑн чӑвашла уяв пулчӗ теес килет. Урӑхла пулма та пултараймасть пулӗ — ара, Марина Карягина хӑй те чӑваш культури аталантар тесе пӗтӗм чунне парса ӗҫлет-ҫке.

#пултарулӑх каҫӗсем, #вулавӑшсем, #Чӑваш филологийӗпе культура факультечӗ, #Ҫеҫпӗл Мишши ячӗллӗ кил-йыш вулав центрӗ