Мускавран хурлӑхлӑ хыпар килчӗ — паллӑ тӗпчевҫӗн, Лия Сергеевна Левитскайӑн чӗри тапма чарӑннӑ.

Юпан 5-мӗшӗнче пытарӗҫ. Мускаври 4-мӗш хула пульницин моргӗ (Тула м., Павловский ур, 25 ҫ.) патӗнче 13 сехет тӗлне пухӑнмалла. Унтан автобус Хован масарӗ таран илсе ҫитерӗ, кайран РӐА чӗлхе пӗлӗвӗн иститутӗнче (44 к.) асӑну иртӗ.

Электронлӑ ҫырусене adybo@rinet.ru (РӐА академикӗ Дыбо Анна Владимировна) адреспа яма пултаратӑр.

Телеграмма ямалла адрес: 125009, Мускав, Мӑн Кисловский тӑкӑрлӑк, 1/12, Чӗлхе пӗлӗвӗн институчӗ (125009, Москва, Б.Кисловский пер. 1/12, Институт языкознания).

Левитская Лия Сергеевна — чӑваш чӗлхин тӗпчевҫи, тюрколог, филологи ӑслӑлӑхӗсен кандидачӗ, Раҫҫей Ӑслӑлӑх академийӗ ҫумӗнчи Чӗлхе пӗлӗвӗн институчӗнчи тӗрӗк чӗлхисен секторӗн ӗҫченӗ. 1931 ҫулхи чӳк уйӑхӗн 23 Мускавра ҫуралнӑ.

Мускаври патшалӑх университечӗнче, СССР Ӑслӑлӑх академийӗ ҫумӗнчи пӗлӗвӗн институчӗнчи аспирантурӑра вӗреннӗ. 1966 ҫулта «Чӑваш чӗлхин историллӗ фонетики» темӑпа кандидат диссертацине хӳтӗленӗ.

Лия Левитская ҫырнӑ «Чӑваш чӗлхин историллӗ морфологийӗ» (Историческая морфология чувашского языка. М., 1976) тӗпчев те пысӑк пӗлтерӗшлӗ, вӑл паян кунччен те историллӗ грамматика проблемисем ҫинчен ҫырнӑ чи лайӑх ӗҫсенчен пӗри шутланать. Кунта пӗрремӗш хут чӑваш чӗлхин сӑмах пулӑвӗпе сӑмах улшӑнӑвӗн аффикссемпе формисен историйӗ ҫинчен туллин ҫырса кӑтартнӑ, чылай ыйтӑва ҫӗнӗлле пӑхса хакланӑ.

Лия Левитскайӑн чӑваш лексикин историйӗпе этимологине тӗпчесе наука ӗҫӗсем ҫырать.

Э.В.Севортянӑн тӗрӗк чӗлхисен словарьне кӑларас ӗҫе те хастаррӑн хутшӑннӑ. (Этимологический словарь тюркских языков. Общетюркские и межтюркские основы на гласные. М., 1974 (ЭСТЯ); ЭСТЯ на букву «Б». М., 1978; ЭСТЯ на буквы «В», «Г», «Д». М., 1980). Авторӗ ҫӗре кӑрсен ҫак словарӗн тепӗр томӗн яваплӑ редакторӗн ӗҫӗсене туса пынӑ (ЭСТЯ на буквы «Ж», «Ж,», «Й». М., 1989). 1997 ҫулта тухнӑ черетлӗ томӑн авторӗсенчен пӗри пулнӑ (ЭСТЯ на буквы «К,», «К». М., 1997).

#чӑваш чӗлхи