«Халап хапха тӑрринче...» литература ӑмӑртӑвӗн пӗрремӗш пайӗ, хайлавсем йышӑнасси, вӗҫленчӗ.

Пурӗ 70 яхӑн хайлав ҫитрӗ. Ку пӗлтӗрхинчен сахалтарах, кризис алхасни сисӗнет-ши? :). Кӑҫалхи ӑмӑртӑва пур районтан та хутшӑннӑ тесен те йӑнӑш пулмӗ пулӗ. Паллах, Пӑрачкав, Улатӑр районӗсене шута илмӗпӗр — конкурсӗ пирӗн чӑвашла. Уйрӑмах Елчӗк, Хӗрлӗ Чутай, Элӗк, Вӑрмар, Канаш районӗнчен нумай хайлав килчӗ.

Ултӑ ӗҫе йышӑнаймарӑмӑр. Пӗри пӗлтӗрхи хайлава ярса панӑ (унпа вырӑн та йышӑннӑччӗ), теприсем е топонимсене ҫеҫ ӑнлантарса панӑ (ку ӑслӑлӑх конкурсӗ мар, литература ӑмӑртӑвӗ) е ӗҫе ярса панӑ чухне йӑнӑшсем тунӑ, пире кирлӗ информацие кӑтартман. Енчен те хутшӑнакан ни хӑш ҫулхине, ни класне палӑртман пулсан — пирӗн ӑна хӑш ушкӑна кӗртмелле тет? Юрать-ха, хӑшӗ-пӗри телефон номерӗсене ҫырса кӑтартнӑ — шӑнкӑравласа пӗлме май пулчӗ. Пӗри тата хайлавне ярса панӑ — ҫырма чӑвашлах ҫырнӑ, анчах тӑррисене лартса тухман. Унашкал ӗҫе, паллах, эпир вырнаҫтараймастпӑр — ӑмӑртӑва та кӗртейместпӗр. Икӗ страница текстра тӑррисене лартса тухма самай вӑхӑт кирлӗ — ку вӑл текста ҫӗнӗрен ҫырнипе пӗрех.

Кӑҫалхи тепӗр уйрӑмлӑх — ӑмӑртӑва Чӑваш Ен тулашӗнчисем хутшӑнни. Тутарстанран 4-5 хайлав килчӗ, вӗсенчен вырӑн йышӑнма юрӑхлисем те пур.

Ӑмӑртӑвӑн малалли пайӗ — конкурса ярса панӑ ӗҫсене хакласси. Конкурса раштавӑн 1-мӗшӗ тӗлне пӗтӗмлетме палӑртнӑ. Ҫав вӑхӑтрах, «Халӑх кӑмӑлне кайнӑ хайлав» номинацине кӑларма пулӑшакан сасӑлав пырать. Мӗнле сасӑламалла? Ӑмӑрту страницине уҫмалла та унта вырнаҫнӑ хайлавсем пирки хӑвӑр шухӑша пӗлтермелле. Хӑш хайлавшӑн ытларах сасӑ пухӑнать — ҫавӑ ҫак номинацине тивӗҫет те. Пӗчӗк асӑрхаттару: малти вырӑнсене тухнӑ хайлавсене шута илмӗпӗр (атту парне айне пулӗҫ тата :))

Мӗнех, ӑмӑрту малалла пырать — сасӑлӑр! Хутшӑнакансене вара ӑнӑҫу сунатпӑр. Хутшӑннӑшӑн тавтапуҫ, тавах сире.

#литература, #чӑваш чӗлхи, #Канаш районӗ, #Елчӗк районӗ, #Тутарстан, #конкурссем, #Хӗрлӗ Чутай районӗ, #Элӗк районӗ