Эрнекун Чӑваш патшалӑх оперӑпа балет театрӗнче ҫӗршывра кӑҫал Литература ҫулталӑкӗ, Чӑваш Енре Константин Ивановӑн иртнине савӑнӑҫлӑ лару-тӑрура уҫрӗҫ.

Программӑна аван йӗркелени пин ҫынлӑ залрисенчен чылайӑшне килӗшрӗҫ. Ҫӑмартара та ҫӳпӗ тупакансем, тен, тиркемелли тупӗҫ те пулӗ-ха, анчах пӗлтӗр Культура ҫулталӑкне уҫнӑ чухнехинчен аванрах пулчӗ тесе хакланине темиҫе ҫынран та илтме тӳр килчӗ. Культура ҫулталӑкне уҫнине пӗлтӗр кайса курман та, калама хӗн.

Театрӑн фойинче ҫыравҫӑсен темиҫе пӗрлешӗвӗ хӑйӗн йышне кӗрекен авторсенчен хӑшӗсенчен ӗҫӗсенчен курав хатӗрленӗччӗ. Республикӑри ытти учреждени те хӑйӗн ӗҫне кӑтартакан курав йӗркеленӗ. Ҫӗнӗ ҫул елки те фойере пурччӗ. Анчах ӑна теттесемпе мар, кӗнекесемпе илемлетнӗ.

Литература ҫулталӑкне уҫма Чӑваш Ен Элтеперӗ Михаил Игнатьев хутшӑнчӗ. Залра ытти хӑш-пӗр тӳре-шара та пурччӗ.

Кирек епле уяври пекех официаллӑ ҫак мероприятире те чыславсем пулчӗҫ. Сӑмахран, Шупашкарти 4-мӗш лицейра вырӑс чӗлхипе литературине вӗрентекен Валентина Михайловӑна «Чӑваш Республикин тава тивӗҫлӗ вӗрентекенӗ» хисеплӗ ят панӑ. Йӗпреҫ районӗнчи Ирҫе Ҫармӑсри шкулта вырӑс чӗлхипе литературине вӗрентекен Валентина Карсакова, Шупашкар районӗнчи Кӑшавӑшри шкулта чӑваш чӗлхипе вӗрентекен Евгений Майков тата Комсомольски районӗнчи Чӗчкенти тутар чӗлхипе литературине вӗрентекен Рамиля Мезитова Элтеперӗн Тав хутне тата ятран паракан сехетне тивӗҫрӗҫ.

#Литература ҫулталӑкӗ, #Константин Иванов ҫулталӑкӗ, #Шупашкар, #Шупашкар районӗ, #литература, #Йӗпреҫ районӗ, #Ирҫе Ҫармӑс, #Кӑшавӑш, #Чӗчкен, #Комсомольски районӗ