Красноармейски районӗнче кӑрлачӑн 29-мӗшӗнче Раҫҫейри Литература ҫулталӑкне, Чӑваш Енри Константин Ивановӑн ҫулталӑкӗ Красноармейскинчи Культура ҫурчӗнче те савӑнӑҫлӑ лару-тӑрура уҫрӗҫ.

Фойере Константин Иванова халалланӑ кӗнекесенчен тата вырӑнти авторсен кӗнекисен куравне йӗркеленӗччӗ. Кунтах ал ӑстисен кружокне ҫӳрекенсен ӗҫӗсене курма пулатччӗ — «Пӳрнеске» тата «Рукодельница» кружокҫӑсем Жанна Михайлова ертсе пынипе чӑн та илемлӗ пуканесем ӑсталанӑ.

Уява райадминистраци пуҫлӑхӗ Владимир Григорьев, райадминистрацин социаллӑ пай енӗпе ӗҫлекен Алексей Васильев хутшӑнчӗҫ. Ҫак районта ҫуралса ӳснӗ паллӑ чӑваш ҫыравҫисем те уява килсе ҫитнӗ. Вӗсен шутӗнче Красноармейски районӗн хисеплӗ гражданинӗ, Чӑваш халӑх писателӗ Юрий Сементер сӑвӑҫ, Раҫҫей тата Чӑваш писателӗсен союз пайташӗсем Галина Васильевӑпа (Ордем Гали) Осип Алексеев (Ӑсан Уҫӑпӗ), Николай Ершов поэт, вӑрҫӑ ветеранӗ, темиҫе кӗнеке авторӗ, Красноармейски районӑн Хисеплӗ гражданинӗ Михаил Прохоров тата ытти ҫыравҫӑсем. Хӑнасем пухӑннисем умӗнче литературӑпа ҫыхӑннӑ ыйтусем ҫинче чарӑнса тӑчӗҫ, ыйтусем ҫине хуравларӗҫ.

Уявра вырӑнти Культура ҫумӗнчи «Трак ен» фольклор ансамблӗ (ертӳҫи А. Никонорова), ветерансен хорӗ (ертӳҫи А. П. Алексеев), «Хунав» пултарулӑх кружокӗн членӗсем (ертӳҫи К.И. Васильева), «Заволжский» клуб коллективӗпе «Асамат кӗперӗ» ачасен театрне ҫӳрекенсем (ертӳҫи Г. А. Петрова), ачасен «Капельки» ансамблӗ М.В. Дмитриев ертсе пынипе хутшӑнса пухӑннисене ӑшӑ кӑмӑл парнелерӗҫ. Трак шкулӗн, Пикшикри тата Красноармейски шкулӗсенчи вӗренекенсем те уява илем кӳчӗҫ.

Сӑнсем (43)

#Красноармейски районӗ, #уявсем, #Константин Иванов ҫулталӑкӗ, #Литература ҫулталӑкӗ, #Красноармейски, #культура, #куравсем, #Пикшик, #шкулсем