Паян Хӗрлӗ Чутай районӗнче ют чӗлхе юррисен фестивалӗ иртрӗ. Ӑна Аслӑ Ҫӗнтерӳ 70 ҫул тултарнине тата Литература ҫулталӑкне халалланӑ.

Районти шкулсенчи юрӑҫсем хӑйсен пултарулӑхне хранцус, акӑлчан, испан тат чӑваш чӗлхипе паллаштарчӗҫ. Фестивале 5–11 классра вӗренекенсем хутшӑнма кӑмӑл тунӑ, юрӑсене ушкӑнпа та, уйрӑммӑн та 17 тӗрлӗ юрӑ шӑрантарчӗҫ. Хӗрлӗ Чутайри вӑтам шкул вӗренекенӗсем ултӑ номер хатӗрленӗ. Шулю тата Мишеркасси шкулӗсенчи 7-мӗш класс ачисем Юрий Васильевич Гурьянов ертсе пынипе «Яланах хӗвел пултӑр!» юрӑпа чӑвашла та, акӑлчанла та паллаштарчӗҫ. Тури Ҫӗрпӳкассинче 9 класра вӗренекен Ирина Романова Светлана Ананьевна Илларионова пулӑшнипе «Эсӗ хитре» юрра чуна тивмелле юрларӗ. Ҫӗнӗ Атикассинчи вӑтам шкулӑн 11 класс вӗренекенӗ Наталия Соловьева акӑлчанла тата испанла икӗ юрӑ янраттарчӗ (вӗрентекенӗ Валентина Чертова). Штанаш шкулӗнче 8-мӗш класра вӗренекен Татьяна Ефремова районта иртекен юрӑ конкурсӗсене яланах хастар хутшӑнать, вӑл «Хӗвеллӗ» акӑлчан юррине юрланине куракансем тӑвӑллӑн алӑ ҫупса йышӑнчӗҫ (вӗрентекенӗ Галина Зотова). Питӗркассисем куракансем умне икӗ юрӑпа тухрӗҫ: Е.Герасимовӑпа А.Медведева та, 10-мӗш класри Дмитрий Алексеев юрлани куракансен кӑмӑлне кайрӗ (вӗрентекенӗ Любовь Архипова). Атнар шкулӗнче 11 класра вӗренекен Ольга Степанова Н.А. Зайцева пулӑшнипе хӑйне евӗрлӗ юрӑ хатӗрленӗ. Хӗрлӗ Чутай шкулӗнче 11 класра вӗренекен Денис Триковскийпе Сергей Борисов юрӑҫсене музыкӑпа пулӑшрӗҫ.

Фестивале кашниех тӑрӑшса хатӗрленнӗ. Ҫитес тӗлпулура вӗренекенсем ют чӗлхе сӑввисене ют чӗлхепе тата унӑн чӑвашла е вырӑсла куҫарӑвӗпе паллаштарма калаҫса татӑлчӗҫ.

Сӑнсем (9)

#Литература ҫулталӑкӗ, #фестивальсем, #Хӗрлӗ Чутай, #Хӗрлӗ Чутай районӗ, #Мишеркасси, #Штанаш, #Тури Ҫӗрпӳкасси, #Ҫӗнӗ Атикасси, #Питӗркасси, #Атнар, #Шулю, #ачасем