Ака уйӑхӗнче яланхи пекех Чӑваш Енре «Кӗнеке урлӑ — халӑхсен килӗшӗвӗ патне» наци кӗнекисен фестивалӗ иртет. Ӑна ЧР Культура министерстви, ЧР Наци вулавӑшӗ йӗркелет.

Кӑҫал ака уйӑхӗн 15–25-мӗшӗсенче тӗп мероприятисем Шупашкарта, Улатӑрта, Чӗмпӗрте, Элӗк, Вӑрнар, Муркаш, Пӑрачкав районӗсенче иртӗҫ.

Ҫав кунсенче Раҫҫей патшалӑх ӳнер вулавӑшӗн коллекцийӗнчи курав, пӗтӗм тӗнчери канашлу уҫӑлӗҫ.

Фестивальпе килӗшӳллӗн итальян тата чӑваш, православи, экологи тата ӑслӑлӑх кӗнекисене халалланӑ тематика кунӗсем пулӗҫ. Уяв йӗркелӳҫисем пурне те чӑваш ҫыравҫи Илпек Микулайӗ ҫуралнӑранпа 100 ҫул ҫитнине халалласа ирттерекен литература каҫӗнче, СССР халӑх артистки Вера Кузьмина ячӗллӗ ӳнер конкурсӗн пӗтӗмлетӳ тапхӑрӗнче тата «Чӑваш Ен литератури: 2013 ҫулхи чи вуланакан кӗнеке» республика конкурсӗн ҫӗнтерӳҫисене чысланӑ ҫӗрте кӗтеҫҫӗ.

Муркаш районӗн ҫыннисемпе Чӑваш халӑх поэчӗ Валери Туркай тата Ольга Туркай тӗлпулу ирттерӗҫ. Элӗк районне вара Лидия Сарине тата Сергей Павлов ҫитӗҫ. Вӑрнар районӗн ҫыннисене Чӑваш халӑх поэчӗ Юрий Сементер тата Сергей Самандаш ҫыравҫӑ хӑйсен пултарулӑхӗ пирки каласа кӑтартӗҫ. Пӑрачкавсем Дмитрий Вонави поэта, куҫаруҫа кӗтсе илӗҫ. Улатӑрта Николай Нарышкин ҫыравҫӑпа литература конференцийӗ иртӗ. Чӗмпӗрте чӑваш писателӗсем «Халӑх туслӑхӗсен литература кӑшӑлӗ» ирттерӗҫ.

#фестивальсем, #кӗнекесем, #Шупашкар, #Улатӑр, #Чӗмпӗр, #Элӗк районӗ, #Вӑрнар районӗ, #Муркаш районӗ, #Пӑрачкав районӗ, #конкурссем